निर्वाचन आचारसंहिता उल्लंघनको क्रम बढ्दो ! गृह प्रशासनले बढायो सक्रियता

काठमाडौं ।

निर्वाचन आचारसंहिता उल्लंघन गर्ने क्रम बढेपछि त्यसलाई रोक्न गृह प्रशासनले सक्रियता बढाएको छ । यही फागुण २१ गते हुने प्रतिनिधिसभाको निर्वाचन नजिकिँदै गर्दा निर्वाचन आचारसंहिता उल्लंघन गर्ने क्रम बढ्दै गएको हो । त्यसलाई रोक्न आयोगले स्पष्टीकरण सोध्ने कार्यलाई तीव्रता दिएसँगै आचारसंहिताको पालना भएको वा नभएको सूक्ष्म तवरमा नियाल्न सक्रियता अघि बढाएको गृह मन्त्रालयका सचिव राजकुमार श्रेष्ठले बताउनुभयो ।

मन्त्रालयले निर्वाचन आचारसंहिता पालनामा कडाइ गर्न ७७ वटै जिल्ला प्रशासन कार्यालयमा बिहीबार पत्राचार गरेको छ । निर्वाचन पूर्व र निर्वाचनको अवधिमा आचारसंहिता उल्लंघनका घटना रोक्न गृह मन्त्रालयले जिल्ला प्रशासन कार्यालयहरूलाई निर्देशन जारी गरेको मन्त्रालयले जनाएको छ । यस निर्वाचन आचारसंहिताका पालनाको अवस्था सूक्ष्म रूपमा नियाल्न कार्यवाहक प्रमुख निर्वाचन आयुक्त रामप्रसाद भण्डारी, गृहमन्त्री ओमप्रकाश अर्यालसँगै सुरक्षा निकायका प्रमुखहरूबीच छलफल भएको थियो ।

यसैबीच आयोगले निर्वाचन आयोगले गत मंगलवार ७७ जिल्लाका सहायक प्रमुख जिल्ला अधिकारी र प्रमुख कोष नियन्त्रकलाई आचारसंहिता अनुगमन अधिकृत तोकेको थियो । आचारसंहिता कार्यान्वयनको सुनिश्चितता गर्न अनुगमन अधिकृत तोकिएपछि गृहले जिल्ला प्रशासन कार्यालयहरूलाई पत्राचार गरी प्राप्त जिम्मेवारीअनुरूप नियमित अनुगमन गरी प्रभावकारी रूपमा आचारसंहिता पालना गर्ने कार्य गर्न गराउन निर्देशन जारी गरेको हो ।