भ्रष्टाचार मुद्दामा तत्कालीन मेयरसहित ९ जनाले पाए सफाइ

काठमाडौँ । जाजरकोटको भेरी नगरपालिकास्थित रानागाउँ-नेटीबजार सडक निर्माणका क्रममा भ्रष्टाचार भएको भन्दै दायर गरिएको मुद्दामा विशेष अदालतले सबै प्रतिवादीहरूलाई सफाइ दिएको छ ।

विशेष अदालतका अध्यक्ष न्यायाधीश सुदर्शनदेव भट्ट र न्यायाधीश हेमन्त रावलको इजलासले बुधबार भ्रष्टाचार मुद्दामा दावी नपुग्ने ठहर गर्दै प्रतिवादी बनाइएका भेरी नगरपालिकाका तत्कालीन प्रमुख (मेयर) दल बहादुर घर्तीसहित ९ जनालाई सफाई दिएको हो ।

अदालतबाट सफाइ पाउनेहरूमा भेरी नगरपालिकाका तत्कालीन प्रमुख दल बहादुर घर्ती, मोहन मल्ल, अनिश शाह, प्रकाशकुमार शाही, राजेन्द्रबहादुर कठायत, कृतिबहादुर थापा, गंगाकुमारी खड्का खत्री, चित्रबहादुर बोहोरा र निर्माण कम्पनी M/S New BK/Nahakuli J.V रहेका छन् ।

नगरपालिकाले आह्वान गरेको रानागाउँ-नेटीबजार सडक निर्माणको ठेक्का (अनुमानित लागत रु. २ करोड ८० लाख ४२ हजार ७४३) मा ‘साइट भिजिट’ (निर्माण स्थलको अवलोकन) को अनिवार्य सर्त राखेर अन्य प्रतिस्पर्धा गर्ने बोलपत्रदातालाई पाखा लगाएको र आर्थिक अनियमितता गरेको आरोप अख्तियारको थियो ।

बोलपत्रमा सहभागी भएका ८ वटा फर्ममध्ये ७ वटालाई ‘साइट भिजिट’ प्रमाणपत्र नबुझाएको भन्दै प्राविधिक मूल्याङ्कनबाटै अयोग्य घोषित गरी एउटा मात्र फर्म (थापा-सविन-सुदर्शन जे.भी.) लाई छनोट गरिएको थियो ।

अदालतले फैसलामा ‘साइट भिजिट’ को सर्त सार्वजनिक खरिद ऐन, २०६३ र नियमावली, २०६४ को परिधिभित्रै रहेको उल्लेख गरेको छ । फैसलामा भनिएको छ- ‘बोलपत्रमा साइट भिजिटको सर्त राख्नु सार्वजनिक खरिद ऐन र नियमावली बमोजिम नै देखिएको र यसले समान प्रतिस्पर्धामा अवरोध पुर्‍याएको देखिएन ।’

त्यस्तै विवादित भनिएको सडक निर्माण कार्य तोकिएको समयमै सम्पन्न भई योजना हस्तान्तरण भइसकेको र हाल सडक सञ्चालनमा रहेको देखिएको फैसलामा उल्लेख छ ।

अदालतले प्रतिवादी बनाइएका ९ जनालाई भ्रष्टाचार मुद्दा दर्ता गर्दा ठोस प्रमाणको अभाव देखिएको फैसलामा उल्लेख गरेको छ । ‘प्रतिवादीहरूले रिसवत (घूस) लिएको, दबाब दिएको वा अनुचित लाभ लिएको भन्ने पुष्टि हुने कुनै ठोस प्रमाण देखिदैन,’ फैसलामा भनिएको छ ।