स्व. चेतनदिपको सम्झनामा अनेरास्ववियुले हाजिरीजवाफ प्रतियोगिता गर्दै

धनगढी । अखिल नेपाल विद्यार्थी युनियन (अनेरास्ववियु)ले हाजिरीजवाफ प्रतियोगिता आयोजना गर्ने भएको छ । अनेरास्ववियुले पूर्व अध्यक्षसमेत रहेका सहिद चेतनदिप अयडीको सम्झनामा सहिद चेतनदिप अयडी हाजिरीजवाफ प्रतियोगिता आयोजना गर्ने भएको हो । 

प्रतियोगिता पुस १९ गते कैलाली बहुमुखी क्याम्पसमा हुने अनेरास्ववियुले जनाएको छ ।

अनेरास्ववियुका अनुसार प्रतियोगिता माध्यामिक तह तथा क्याम्पस स्तरीय हुनेछ । प्रतियोगिता दिवंगत अयडीको सम्झनासँगै विद्यार्थीको क्षमता अभिवृद्धि गर्ने उद्धेश्यले आयोजना गर्न लागिएको अनेरास्ववियु कैलालीका अध्यक्ष कुबेर खड्काले बताएका छन् । 

खड्काका अनुसार प्रतियोगितामा विद्यार्थीहरुलाई भूराजनीतिक अवस्थाबारे पनि जागरण सृजना गरिनेछ ।

प्रतियोगितामा जिल्लाभरका ३० वटा समूहको सहभागिता रहने बताइएको छ । प्रतियोगितामा प्रथम हुनेलाई ३० हजार रुपैयाँ, दोस्रो हुनेलाई २० हजार र तेस्रो हुनेलाई १० हजार रुपैयाँ र प्रमाणपत्र प्रदान गरिनेछ । उक्त प्रतियोगितामा सहभागी हुन टिम दर्ता शुल्क भने एक हजार रुपैयाँ तोकिएको छ ।