रेशम–रन्जिताको ‘राजनीतिक डिभोर्स’

काठमाडौं : नागरिक उन्मुक्ति पार्टी (नाउपा)का संस्थापन रेशम चौधरी र अध्यक्ष रन्जिता श्रेष्ठको ‘राजनीतिक डिभोर्स’ भएको छ।

तर चौधरीले भने रन्जितासँगका सबै प्रकारका सम्बन्ध सकिएको बताएका विवरण प्राप्त भएका छन्।

दम्पत्तीको विवाद राजनीतिक दलको नेता को हो भन्ने विषयमा लामो समयदेखि चलि आएको थियो। 

रन्जिताले अध्यक्षका हैसियतमा केन्द्रीय समितिको बैठक डाक्दा रेशम चौधरीलाई कुनै पनि प्रकारको जानकारी नै दिन आवश्यक ठानिनन्। 

रन्जिताको अध्यक्ष पद रेशम पक्षले अपदस्त गरे पनि निर्वाचन आयोगले आधिकारिकता दिएको थियो।

नाउपा केन्द्रीय कार्यसमितिको बैठक आइतबार सुरु भएको छ।  अध्यक्ष रञ्जिता श्रेष्ठले बोलाएको बैठकमा सो पार्टीका संरक्षक रेशम चौधरी भने सहभागी छैनन् । 

बैठकका लागि रन्जिताले चौधरीलाई निम्ता नै नदिएकी हुन्। यो बैठकमा पार्टी गठन गर्ने बेला निर्वाचन आयोगमा नाम पठाइएका २१ जना केन्द्रीय सदस्यहरू सहभागी छन्। 

रेशम चौधरी संस्थापक भए पनि उनको नाम निर्वाचन आयोगमा छैन। त्यही भएर उनलाई नबोलाएको सो पार्टीका एक नेताले बताए। 

यस विषयमा चौधरीको प्रतिक्रिया पनि सतहमा आएको छ।

चौधरीले पत्नीसमेत रहेकी पार्टी अध्यक्ष रन्जितासँगको सबै सम्बन्ध समाप्त भएको बताएका छन्। 

रन्जिताले बोलाएको बैठकमा पार्टीका संस्थापक केन्द्रीय सदस्य, प्रतिनिधिसभा सदस्य, प्रदेशसभा सदस्य, पालिका प्रमुख र उपप्रमुखलाई अनिवार्य उपस्थित हुन भनिएको थियो र सोही अनुसार बैठक सुरु भयो।

बैठकमा समसामयिक राजनीतिक विषय, विधान संशोधन, केन्द्रीय सदस्य मनोनयन र निर्वाचन आयोग अद्यावधिकलगायत विषयमा छलफल हुने रन्जिताले लेखको पत्रमा उल्लेख छ।

रेशमले दिएको प्रतिक्रियात्मक विवरण अनुसार ‘मलाई औपचारिक जानकारी केही छैन, मैले पनि सामाजिक सञ्जाल र मिडियाबाटै यो कुरा थाहा पाएको हो’ भन्ने सतहमा आएको छ।

‘हामीलाई जानकारी नै नगराई बैठक बोलाएपछि अध्यक्ष रन्जिता श्रेष्ठ चौधरीले मसँगको सबै प्रकारका सम्बन्ध समाप्त गर्न खोजिएको देखिन्छ। उहाँले सबै सम्बन्ध समाप्त पार्नुभयो’ रेशमलाई उदृत गर्दै आएका विवरणमा उल्लेख छन्।

‘मैले दुःख गरेर जेलभित्रैबाट पार्टी स्थापनाका लागि मरिहत्ते गरेको छु। अहिले आएर एकलौटी बनाइयो। मलाई बाइपास गरेर जान खोजियो तर माग–मुद्दाका बारेमा मेरो आवाज कहिले पनि दबिने छैन। सधैँ बुलन्द गर्नेछु’ भन्ने पनि रेशमले बताएका विवरणमा उल्लेख छन्।

यसअघि, साउन १६ गते बसेको रेशम पक्षको राष्ट्रिय भेलाले रन्जितालाई हटाएर लालवीर चौधरीलाई अध्यक्ष बनाएको थियो। तर, निर्वाचन आयोगले कारबाहीलाई मान्यता नदिएपछि रन्जिता नै अध्यक्षमा छिन्।

यसपछि उनी सत्ता पक्षीय गठबन्धनको बैठकमा सहभागी बनिन् भने संसद सचिवालयमा सत्ता पक्षमा बस्न पाउनुपर्ने निवेदन पनि दिएकी थिइन्। रेशम पक्षले सरकारलाई दिएको समर्थन फिर्ता लिएको थियो भने रन्जिताले कायम रहेको जानकारी गराइकी थिइन्।