डा. केसीले थाले कैलालीको गेटामा २३ औं सत्याग्रह

काठमाडौँ — चिकित्सा शिक्षा सुधारका अभियन्ता डा. गोबिन्द केसीले आइतबारदेखि कैलालीस्थित गेटाको सहिद दशरथ चन्द्र स्वास्थ्य विज्ञान विश्वविद्यालय प्रतिष्ठानमा २३औं सत्याग्रह सुरु गरेका छन्।

चिकित्सा शिक्षा र स्वास्थ्य क्षेत्र सुधारका लागि निरन्तर आन्दोलित केसीले यसपाला निजी मेडिकल कलेजमा गरिएको सिट वृद्धि फिर्ता गर्नुपर्ने माग राखेका छन् ।

प्रधानमन्त्री केपी शर्मा ओलीको निर्देशनमा चिकित्सा आयोगले एमबीबीएस लगायत विभिन्न विषयको निजी मेडिकल कलेजमा सिट बढाउने निर्णय गरेको थियो । विज्ञहरुले समेत उक्त निर्णयको आलोचना गर्दै आएका छन् । उनिहरुले यस्तो निर्णयले चिकित्सा शिक्षाको गुणस्तरमा असर पुग्ने बताउँदै आएका छन् । एक सय सिट सम्म एमबीबीएस पठनपाठन गराउँदै आएका मेडिकल कलेजलाई पछिल्लो निर्णयले १ सय ३० कोटामा विद्यार्थी भर्ना गर्न सिट वृद्धि गरेको छ ।

डा. केसीले कैलालीबाट विज्ञप्ति जारी गर्दै ३ दिनका लागि सत्याग्रह थालनी गरिएको बताएका छन् । ‘चिकित्सा शिक्षा ऐनको मर्मविपरित प्रधानमन्त्री ओलीको नाजायज र प्रत्यक्ष हस्तक्षेपका कारण हालै चिकित्सा शिक्षा आयोगले निजी मेडिकल कलेजहरुको सिट बढाउने गैरजिम्मेवार निर्णय गरेको छ । त्यसलगायत केही समययताका आयोग, सरकार र अदालतका गलत निर्णय तथा फैसलाले चिकित्सा शिक्षा ऐनको अस्तित्व नै धरापमा परेको छ । विद्यार्थी भर्ना सिट संख्या वृद्धि गर्दा नेता र माफियाको झोला त भरिन्छ तर शिक्षाको गुणस्तरमा ह्रास आउँछ । मेडिकल शिक्षा जस्तो सम्वेदनशील क्षेत्रको गुणस्तरमा ह्रास आउनुको मतलब जनताको स्वास्थ्य सेवाको गुणस्तरमा ह्रास आउनु हो । अर्थात् आम नेपालीको स्वास्थ्यमा खेलबाड गर्नु हो,’ जारी गरेको विज्ञप्तिमा भनिएको छ ।

आयोगका कार्यकारी उपाध्यक्ष अञ्जनीकुमार झाको गैरजिम्मेवारीका कारण पनि सिट बढाउने निर्णय भएको डा. केसीको दावी छ । उनले इलाम, उदयपुर र डडेलधुरामा सरकारी मेडिकल कलेज तथा अस्पताल खोल्ने र कैलालीको गेटामा पूर्णरूपमा अस्पताल सेवा र शैक्षिक कार्यक्रम सञ्चालन गर्न समेत माग राखेका छन् ।

विगतमा सरकारसँग भएका सम्झौताअनुसार एकीकृत स्वास्थ्य विज्ञान प्रतिष्ठान ऐन र विश्वविद्यालय पदाधिकारी नियुक्ति उच्च शिक्षा ऐन, गैरनाफामुलक मेडिकल शिक्षा, स्वास्थ्य संस्थामा दरबन्दी पुनरावलोकनको व्यवस्था गर्नुपर्ने जनाएका छन् । ‘यी समस्याहरूको सम्बोधन गर्नुको साटो ओली र शेरबहादुर देउवाको गठबन्धन सरकार जुनसुकै मूल्यमा निजी मेडिकल कलेजहरुलाई पोस्नमा उद्यत् देखिएको छ ।

यसअघि विभिन्न सरकारसँग बारम्बार सम्झौता भएता पनि इलाम, उदयपुर र डडेलधुरामा सरकारी मेडिकल कलेज तथा अस्पताल खोल्न र निर्माण सम्पन्न भएको पाँच वर्ष बितिसक्दा पनि कैलालीको गेटामा शैक्षिक कार्यक्रम तथा अस्पताल सेवा संचालन कुनै प्रधानमन्त्रीको प्राथमिकतामा पर्दैन,’ डा. केसीद्धारा विज्ञप्तिमा उल्लेख छ ।