बालेनले भने- महानगर प्रहरीको काम सिनेमा हेरे जस्तो लाग्छ

काठमाडौं : काठमाडौँ महानगरपालिकाका मेयर बालेन्द्र शाहले महानगर प्रहरीको काम सिनेमा हेरे जस्तो लाग्ने गरेको बताएका छन् । ३३ औं महानगर प्रहरी दिवसको अवसरमा आज (शनिबार) काठमाडौँमा आयोजित कार्यक्रममा उनले यस्तो टिप्पणी गरेका हुन् ।

उनले सानोमा हलिउड फिल्म हेर्दा सिटी पुलिसले गरेको जस्तो काम अहिले काठमाडौँ महानगर प्रहरीले गरिरहेको बताए । फिल्ममा देखाइएको काम वास्तविक जीवनमा हुनु खुशीको कुरा भएको उनले बताएका छन् ।

उनले काठमाडौँ महानगरबाट धेरै पालिकाले काम गर्ने शैली सिक्न खोजेको पनि बताए । त्यसमा महानगर प्रहरीको ठूलो योगदान रहेको उनको भनाइ छ ।

काठमाडौँ महानगरपालिका भित्रका सार्वजनिक सम्पत्ति संरक्षण गर्ने, अतिक्रमण हटाउने, सुशासन, सुव्यवस्था र अनुगमन गर्ने काममा नगर प्रहरीको महत्वपूर्ण भूमिका रहेको उनले बताए ।

शाहले भने, ‘धेरै पालिका छन्, धेरै ठाउँ छन् । काठमाडौँ महानगरपालिकाबाट केही सिक्न चाहन्छन् । जुन ठाउँहरूले काठमाडौँ महानगरपालिकाबाट केही सिक्न खोज्नु हुन्छ, त्यो सिकाइमा तपाईहरूको ठूलो योगदान छ ।

सार्वजनिक सम्पत्ति संरक्षण, अतिक्रमण हटाउनेदेखि लिएर काठमाडौँ महानगरपालिकामा सुशासन, सुव्यवस्था, अनुगमन गर्ने काममा तपाईँहरूको उल्लेखनीय योगदान रहेको छ । सानोमा रमाइलो याद आउँछ, हामी हलिउड फिल्म हेथ्र्यौ, पुराना फिल्म हेर्दा न्युयोर्क सिटी पुलिसको कारबाही हेर्दा लाग्थ्यो—काठमाडौँसहित देशका विभिन्न पालिकामा सिटी पुलिस कस्तो हुनुपर्छ भन्ने कुरा सिनेमामा मात्रै देखिन्थ्यो । अहिले तपाईहरूको काम हेर्दा कहिलेकाहीँ सिनेमा हेरे जस्तो लाग्छ । त्यो खुशीको कुरा हो ।’

काठमाडौँ महानगरपालिकालाई जसरी राजधानीको रूपमा चिनिन्छ, महानगर प्रहरी बल पनि काठमाडौँको पर्यायवाची पहिचानको रूपमा स्थापित भएको उनले बताए । उनले भने, ‘तपाईहरूले देखाउनु भएको कर्मनिष्ठ र योगदान अहिलेका तीन वर्षमा मात्रै नभई आगामी दिनमा पनि विभिन्न सिटी पुलिस तथा स्थानीय सरकारका लागि एउटा सिकाइको रूपमा रहनेछ ।’