सुदूरपश्चिमसहित देशका अरू ठाउँमा हल्कादेखि मध्यम वर्षा

काठमाण्डौ : देशका धेरै ठाउँमा रातिदेखि नै पानी परिरहेको छ । दार्चुला, डोटी, अछाम, बाँके, दाङ, पर्वत र जाजरकोटमा ठूलो पानी परेको मौसम पूर्वानुमान महाशाखाले जनाएको छ । अछामको कैलाश नदी जलमापन केन्द्रमा जल सतहले सतर्कता तह पार गरेको र बढ्दो क्रममा रहेकोले त्यस नदी किनारका बासिन्दालाई सतर्कता अपनाउन महाशाखाले आग्रह गरेको छ ।

दार्चुला, डोटीको जिंगराना, अछामको चित्रेघाट, बाँकेको पश्चिम राप्ती, दाङको जलकुण्डी, पर्वतको पन्चासे र वरपरका क्षेत्रमा पनि मध्यमदेखि ठूलो पानी परेको छ । त्यस क्षेत्र भइ बहने चमेलिया नदी, बउलीगाड, कैलाश नदी, लोहरे खोला लगायत अरू स–साना खोलाहरूमा आकस्मिक बहाब बढ्ने सम्भावना भएकाले नदी किनारका क्षेत्रमा आवश्यक सतर्कता अपनाउन महाशाखाको आग्रह छ ।

यस्तै जाजरकोटको जाजरकोट वर्षामापन केन्द्रमा मध्यम वर्षा मापन भएको भएकाले त्यस क्षेत्र भइ बहने स–साना खोलाहरुमा बहाब बढ्न सक्ने र कमजोर तथा भिरालो जमिनमा पहिरोको जोखिम रहेको भन्दै महाशाखाले सावधानी अपनाउन भनेको छ ।काठमाण्डौ उपत्यकासहित देशका अरू ठाउँमा हल्कादेखि मध्यम वर्षा भएको छ ।

आज पनि देशका धेरै ठाउँमा पानी पर्ने महाशाखाले जनाएको छ । महाशाखाका अनुसार कोशी, बागमती, गण्डकी र सुदूरपश्चिम प्रदेशका पहाडी भेगमा ठूलो पानी पर्ने सम्भावना छ ।