झोलुङ्गे पुल बनेपछि मोहना नदी वारपार गर्न सहज

कैलाली: कैलालीको कैलारी गाउँपालिका र मोहनपुर जोड्ने मोहना नदीमा झोलुङ्गे पुल बनेपछि स्थानीयलाई आवतजावतमा सहज भएको छ। कैलारी गाउँपालिका४ भितरीया र वडा नं ३ मोहनपुरको सिमानास्थित मोहना नदीमा पुल नहुँदा स्थानीयलाई वारपार गर्न समस्या थियो । स्थानीयले काठको नाउँ प्रयोग गर्दै आएका थिए । वर्षायाममा नदीमा पानीको प्रवाह बढेपछि गाउँलेहरुले झनै समस्या भोग्थे । सो स्थानमा झोलुङ्गे पुल निर्माण भएपछि वर्षौँदेखिको समस्या समाधान भएको छ ।

पुल नहुँदा काठे नाउँको भरमा वारपार गर्नुपर्ने बाध्यता थियोे  वर्षायाममा झनै जोखिम हुन्थ्यो स्थानीय कृष्णकुमार चौधरीले भने पुल निर्माण पश्चात् यहाँका नागरिकलाई राहत मिलेको छ। स्थानीयका अनुसार वडा नं ३ को मोहनपुरमा झण्डै ९६ घर छन्।
पुल नहुँदा सबैभन्दा बढी समस्या विद्यालय जाने बालबालिकालाई हुने गरेको थियो ।

स्थानीयवासी साँझ, बिहान बजारबाट सामान लिन जाँदा समेत नदी वारपार गर्न नाउ प्रयोग गर्नुपर्दथ्यो । हालैमात्र पुल सञ्चालनपश्चात् सहजै आवतजावत गर्न सकिएको छ ।सङ्घीय सरकारको सहरी विकास मन्त्रालय स्थानीय पूर्वाधार विभागअन्तर्गत ‘सस्पेन्सन ब्रिज डिभिजन को रु तीन करोड ४३ लाखमा उक्त झोलुङ्गे पुल निर्माण गरिएको हो ।