धनगढी-५ का १५ विपन्न परिवारलाई त्रिपाल वितरण

धनगढी । धनगढी उपमहानगरपालिका वडा नम्बर ५ ले विपन्न परिवारलाई त्रिपाल वितरण गरेको छ । बर्खायाममा कच्ची घरमा बस्दै आएका १५ परिवारलाई वडा कार्यालयले त्रिपाल वितरण गरेको हो ।

यसै पनि आइतबार रातीदेखि परेको पानीका कारण अहिले धनगढी उपमहानगरपालिकाका अधिकांश ठाउँ डुबानमा परेका छन् । त्यसैमाथि कच्ची घरमा बसोबास गर्दै आएका परिवार डुबान र छानो चुहिने समस्याबाट प्रताडित बनेका छन् । सोही समस्यालाई ध्यानमा राख्दै छानो चुहिने समस्या झेल्दै आएका १५ परिवारलाई १६ वटा त्रिपाल वितरण गरिएको वडा कार्यालयले जनाएको छ ।

ती परिवारहरुलाई राहतस्वरुप त्रिपाल वितरण गरिएको वडा अध्यक्ष गजेन्द्र बहादुर शाही (गज्जु)ले बताएका छन् । अध्यक्ष शाहीका अनुसार घर भित्रै पानी पसेर मर्कामा परेका नागरिकलाई तत्काल राहत पुगोस् भन्ने उद्धेश्यले वडाको तर्फबाट त्रिपाल वितरण गरिएको हो ।

त्यस्तै अध्यक्ष शाहीले अन्य टोल, बस्ती वा छिमेकमा डुबान र वर्षाले मर्कामा परेका परिवार भए वडा कार्यालयमा सम्पर्क गर्न पनि अनुरोध गरेका छन् ।

उनले बर्खायाममा जोखिममा रहेको परिवारलाई प्राथमिकतामा राखेर राहत सामाग्री वितरण गरिने जनाएका छन् । उनले डुबानको समस्या झेलिरहेको धनगढीमा कसैलाई सहयोगको खाँचो परे वडा कार्यालयमा सम्पर्क गर्न पनि आग्रह गरेका छन् ।