बैतडीमा कुकुरको टोकाइबाट एक बालकको मृत्यु

बैतडी : बैतडीमा कुकुरको टोकाइबाट एक बालकको मृत्यु भएको छ । जिल्लाको पुर्चौंडी नगरपालिका–६ कुयलीगाउँका १२ बर्षीय अनिल साउँदको कुकुरको टोकाइबाट आइतबार मृत्यु भएको स्थानीय समेत रहेका शिक्षक मनोज साउँदले बताए ।

अनिललाई करीब दुई हप्ता अगाडि कुकुरले टोकेको थियो । कुकुराको टोकाइबाट उनको टाउकोमा चोट लागेको थियो । कुकुरको टोकाइबाट घाइते भएका अनिललाई उपचारका लागि धनगढी लगिएको थियो ।

धनगढीको सेती प्रादेशिक अस्पतालमा उपचार गरेर तीनदिन अगाडिमात्रै घरमा ल्याएका अनिलको स्वास्थ्यमा थप समस्या आएपछि आइतबार अस्पताल लैजाने क्रममा बाटोमै मृत्यु भएको बताइएको छ । आइतबार साँझ ६ बजेतिर डडेल्धुरा नजिक पुग्दा उनको मृत्यु भएको हो ।

कुकुरको टोकाइबाट घाइते भएका अनिलमा रेबिजका लक्षण देखिएका थिए । उनी पानी देख्ने बित्तिकै निकै डराउने भएका थिए। जनता आधारभूत विद्यालय रौनालीचौडमा कक्षा ७ मा अध्ययनरत अनिलको मृत्यु भएपछि पुरै गाउँ शोकमा डुबेको शिक्षक साउँदले बताए ।