धनगढी-अत्तरिया ६ लेन सडककाे मनहराखाेलामा चार वर्षसम्म पुल बनेन

धनगढी : कैलालीको धनगढी–अत्तरिया छ लेन सडकमा पर्ने मनहराखोलामा पुल निर्माणले गति लिन सकेको छैन । बजेट अभावका कारण पुल निर्माणले गति नलिएको बताइएको छ । 

सहिद दशरथ चन्द स्वास्थ्य विज्ञान विश्वविद्यालय अगाडि निर्माणाधीन पुलको काम ६० प्रतिशत काम पूरा भएको छ । 

चालु आर्थिक वर्षमा पुल निर्माणका लागि पर्याप्त बजेट नआएका कारण निर्माण कार्यले तीव्रता नलिए पनि निर्माण कम्पनीले काम जारी राखेको महाकाली पुल योजना कार्यालयले जानकारी दिएको छ। सो कार्यालयका अनुसार यस आर्थिक वर्षमा पुलका लागि एक करोड ३५ लाख बजेट आएको सबै रकम भुक्तानी दिइसकेको इन्जिनियर सन्तोष चन्दले बताए। उनले अझै एक करोड रुपियाँ रकम भुक्तानी दिन बाँकी रहेको बताए। 

आर्थिक वर्ष २०७७/७८ मा यो पुलको ठेक्का सम्झौता भएको थियो । उच्चकोटी/शनिदेव/साजेन्द्रेश्वर जेभीले भ्याटसहित सात करोड ८३ लाख ३२ हजारमा ठेक्का पाएर काम गरिरहेको छ। आगामी भदौ २८ गतेसम्म यो पुलको ठेक्का समायवधि रहेको छ। धनगढी–अत्तरिया छ लेन सडक अन्तर्गत तीन वटा पुल निर्माण भइरहेका छन्। मनहराखोला पुलकै केही दुरीमा सुनीखोलामा बनिरहेको पुलको काम भने लगभग पूरा भएको छ।

आव २०७७/७८ मा ठेक्का पाएर राजेन्द्र निर्माण सेवाले सो पुल निर्माण गरेको छ। आगामी असार १५ सम्म पुल निर्माणको समायवधि रहेको छ। यसै गरी त्रिनगर भन्सारस्थित मोहना नदीमा बनिरहेको पुलको भौतिक प्रगति ६० प्रतिशत पुगेको छ। 

आव २०७८/७९ मा ठेक्का सम्झौता भई पुल निर्माणको काम अगाडि बढाइएको थियो। 

यस पुलका लागि पर्याप्त मात्रामा बजेट आएका कारण काम तदारुकताका साथ अगाडि बढिरहेको महाकाली पुल योजना कार्यालयले जनाएको छ। १३ करोड १७ लाख रुपियाँमा ठेक्का पाएर रायमाझी कन्स्ट्रक्सन प्रालिले पुल निर्माणको काम गरिरहेको छ। यस पुलको ठेक्का अवधि गत वैशाख २१ मा सकिएको छ।