लागुऔषध र बैंकिङ कसुरमा फरार दुई प्रतिवादी पक्राउ

 सुदूरपश्चिमबाट लागुऔषध र बैंकिङक कसुरमा फरार दुई प्रतिवादी पक्राउ परेका छन । प्रहरीले लागुऔषध मुद्धामा फरार बर्दियाको गुलरिया नगरपालिका– ९ बस्ने २३ वर्षिया मार्था सुनारलाई र बैंकिङ कसुरमा फरार दार्चुलाको नौगाड गाउँपालिका– ४ सिप्टी बस्ने गणेश सिँह ठगुन्नालाई पक्राउ गरेको हो ।

लागुऔषध मुद्धामा दोषी ठहर भएकी सुनारलाई धनगढी उपमहानगरपालिका– ३ भन्सार कार्यालय नजिकबाट पक्राउ गरिएको सुदूरपश्चिम प्रदेश प्रहरी कार्यालयले जनाएको छ । उनलाई जिल्ला अदालत कैलालीको फैसलाले लागुऔषध मुद्धामा १ महिना कैद सजाय र रु. ५ हजार जरिवाना तोकेको थियो ।

यस्तै बैंकिङ कसुरमा दोषी देखिएका ठगुन्नालाई दार्चुलाकै महाकाली नगरपालिका– ४ बाङ्गाबगर बजारबाट पक्राउ गरिएको प्रहरीले जनाएको छ । ठगुन्नालाई उच्च अदालत पाटनले २०७७ मंसिर २२ गतेको फैसलाले बैंकिङ कसुरमा दोषी ठहर गरेको सुदूरपश्चिम प्रदेश प्रहरी कार्यालयले जनाएको छ । प्रहरी कार्यालयका अनुसार अदालतले ठगुन्नालाई दोषी ठहर गरी ५ दिनको कैद सजाय र ९ लाख ५५ हजार ८४० रुपैया जरिवाना तोकेको थियो ।