फेसबुकमा भएको चिनजानले होटलमा पुगेपछि ‘हनी ट्रयाप,गोदावरीकी ममताको अनौठो ध*न्दा

धनगढी : होटलमा बोलाएर गोप्य तस्विर तथा भिडियो खिच्ने अनि त्यसैलाई हतियार बनाएर लाखौँ रुपैयाँ असुल्ने योजनामा संलग्न दुई युवतीलाई काठमाडौं उपत्यका अपराध अनुसन्धान कार्यालयले प्रहरीले पक्राउ गरेको छ ।

सामाजिक सञ्जाल फेसबुकबाट प्रारम्भ भएको सामान्य चिनजान अन्ततः ब्ल्याकमेलको हतियार बनेको प्रहरी अनुसन्धानले देखाएको छ ।

कार्यालयका प्रवक्ता प्रहरी उपरीक्षक काजीकुमार आचार्यका अनुसार पक्राउ पर्नेमा गोदावरी नगरपालिका–१०,कैलाली घर भई हाल काठमाडौं महानगरपालिका–५ बस्दै आएकी ३४ वर्षीया ममता तामाङ तथा भक्तपुर नगरपालिका–१७ घर भई हाल काठमाडौं–५ बस्दै आएकी ३४ वर्षीया आँचल श्रेष्ठ भनिने आँचल चौगुठी रहेका छन्।

दुबैलाई काठमाडौं महानगरपालिका–११ हनुमानस्थानबाट जेठ ७ गते पक्राउ गरिएको आचार्यले बताए ।

उनीहरू फेसबुकमार्फत् विभिन्न युवतीको फोटो राखेर पुरुषहरूलाई सम्पर्कमा ल्याउँथे । प्रारम्भमा साधारण कुराकानी गर्दै उनीहरूले आफूप्रति आकर्षण जगाउँथे ।
अनि विस्तारै सम्बन्ध प्रगाढ बनाउँदै जान्थे । सम्बन्ध बलियो बनाएपछि होटल अथवा रिसोर्टमा भेट्न बोलाउँथे । त्यस्ता भेटघाटहरू विशेष रूपमा नियोजित हुने गरेका थिए ।

आचार्यका अनुसार उनीहरूले होटलमा खाजा, खाना र मदिरासहितको सेवा दिँदै गोप्य रूपमा पीडितको फोटो र भिडियो खिच्थे ।

अधिकांश अवस्थामा ती दृश्यहरू आपत्तिजनक हुने गरी खिचिएका हुन्थे । ‘तिनै सामग्रीहरूलाई आधार बनाएर उनीहरूले पीडितमाथि मानसिक दवाव दिन्थे,’ आचार्यले भने– ‘तपाईंको घर–परिवार, कार्यक्षेत्र अथवा सामाजिक सञ्जालमा यिनै तस्विर सार्वजनिक गरिदिन्छौँ भन्दै धम्क्याइन्थ्यो ।’

त्यस्ता धम्कीबाट डराएका धेरै व्यक्तिहरू आफैँ सम्पर्कमा आएर रकम बुझाउने अवस्थामा पुग्थे । काठमाडौंमा भएको पछिल्लो घटनामा ती युवतीले एक व्यक्तिलाई ब्ल्याकमेल गरेर काठमाडौंमा चार आना जग्गा माग गरेका थिए । पाँच लाख रुपैयाँ बराबरको चेक लिइसकेको प्रहरी अनुसन्धानबाट खुलेको छ ।

प्रहरीका अनुसार उनीहरूको साथबाट विभिन्न कम्पनीका दुई वटा मोबाइल फोन बरामद गरिएको छ, जसमा अनुसन्धानका लागि आवश्यक डिजिटल प्रमाणहरू संकलन भइरहेको छ ।

प्रहरीका अनुसार घटनामा संलग्न दुवै युवतीले पछिल्लो समय सामाजिक सञ्जालमा सक्रियता बढाएका थिए । उनीहरूले फेसबुकमार्फत रोजगारी वा सम्बन्धको झुठो प्रस्ताव गरेर लक्षित व्यक्तिहरूसँग सम्पर्क बनाउँथे अनि व्यक्तिगत भेटघाटमा पुगेर उनीहरूलाई फसाउने योजनामा संलग्न हुन्थे ।

प्रहरीले यो घटनालाई ‘हनी ट्रयाप’ अर्थात् भावनात्मक सम्बन्धको जालमा पारेर गरिने ठगीको आधुनिक स्वरूपको रूपमा व्याख्या गरेको छ ।

काठमाडौं उपत्यकामा पछिल्ला वर्षहरूमा सामाजिक सञ्जाल र डिजिटल मिडिया प्रयोग गरेर ठगी गर्ने घटनाहरू बढ्दो क्रममा छन् । आचार्यका अनुसार हालसम्म यो गिरोहले कति जनालाई निशाना बनाएको भन्ने विषयमा अनुसन्धान भइरहेको छ । उनले भने– ‘गोप्य फोटो र भिडियो खिचेर ब्ल्याकमेल गर्ने प्रवृत्ति खतरनाक रूपमा विस्तार भएको छ । यस्तो प्रवृत्तिबाट जोगिन सबै नागरिक सचेत हुनु आवश्यक छ ।’

पक्राउ परेका युवतीलाई थप अनुसन्धान तथा कारबाहीको लागि जिल्ला प्रहरी परिसर काठमाडौं पठाइएको छ ।