धनगढी । स्थानीय सेवा ऐन माग्दै आन्दोलनमा उत्रिएका सुदूरपश्चिम प्रदेशका स्थानीय तहका कर्मचारीलाई कार्य क्षेत्र फर्कन आग्रह गरिएको छ । प्रदेशका मुख्यमन्त्री कमलबहादुर शाहले ११ गतेदेखि सुरु हुने प्रदेशसभाको अधिवेशनले उक्त ऐन जारी गर्ने बताउँदै कर्मचारीलाई कार्यक्षेत्र फर्किन आग्रह गरेका हुन् ।
मुख्यमन्त्री शाहले विज्ञप्ति जारी गर्दै कर्मचारीको वृत्ति विकासमा परेको अप्ठेयारालाईसमेत मध्यनजर गरेर स्थानीय सेवा ऐन चाँडै जारी गर्ने भएकाले आन्दोलनका कार्यक्रम फिर्ता लिएर कार्यक्षेत्रमा फर्कन आग्रह गरेका हुन् ।
सुदूरपश्चिम प्रदेश स्थानीय सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक प्रदेश सभामा विचाराधीन अवस्थामा रहेको छ ।
प्रदेश सभाको विधायन तथा प्रदेश मामिला समितिले दफावार छलफल पश्चात आफ्नो प्रतिवेदनसमेत सभामुखलाई बुझाइसकेको छ । स्थानीय सेवा ऐन चाँडै जारी गराउन दबाबस्वरुप स्थानीय तहका कर्मचारीले कार्यालयको कामकाज ठप्प पारेर आन्दोलन गर्दै आएका छन् । उनीहरुले मुख्यमन्त्री तथा मन्त्रीपरिषद कार्यालय अगाडि दैनिक धर्ना दिँदै आएका छन् ।
प्रतिक्रिया दनुहोस्