बैतडीका पालिकामा २३ करोड बेरुजु

बैतडी । बैतडीका १० वटै स्थानीय तहमा २३ करोडभन्दा बढी बेरुजु देखिएको छ ।

महालेखापरीक्षकको कार्यालयले सार्वजनिक गरेको आर्थिक वर्ष २०८०/८१ को प्रतिवेदन अनुसार जिल्लाका १० वटै स्थानीय तहमा २३ करोड ४३ लाख ७० हजार बेरुजु देखिएको हो । ४ नगरपालिका र ६ गाउँपालिका रहेको बैतडीमा प्रतिवेदन अनुसार दोगडाकेदार गाउँपालिकामा ०.८६ प्रतिशत सबैभन्दा कम र डिलासैनी गाउँपालिकामा सबैभन्दा बढी ५.१३ प्रतिशत बेरुजु देखिएको छ । त्यस्तै कम बेरुजु ल्याउने दोस्रोमा पुर्चाैडी नगरपालिका रहेको छ । उसको १.१५ प्रतिशत बेरुजु देखिएको छ ।

बैतडी जिल्ला सदरमुकामस्थित दशरतचन्द नगरपालिकामा कुल एक अर्ब २६ करोड ९१ लाख ५४ हजार रकमको लेखापरीक्षण गरिएकोेमा दुई करोड २४ लाख ७१ हजार अर्थात १.७६ प्रतिशत बेरुजु रकम देखिएको छ ।

पाटन नगरपालिकामा एक अर्ब ४७ करोड ४६ लाख ३० हजार रकमको लेखापरीक्षण गरिएकोमा दुई करोड ७७ लाख ९६ हजार अर्थात १.८८ प्रतिशत बेरुजु देखिएको छ । पुर्चाैडी नगरपालिकामा एक अर्ब ७५ करोड ९३ लाख ६ हजार रकमको लेखापरीक्षण गरिएकोमा दुई करोड एक लाख ९९ हजार अर्थात् १.१५ प्रतिशत बेरुजु देखिएको छ । बैतडीका ४ वटा नगरपालिकामध्ये पुर्चौडीमा सबैभन्दा कम बेरुजु प्रतिवेदनले देखाएको छ ।

मेलौली नगरपालिकामा ९१ करोड पाँच लाख ९८ हजारको लेखापरीक्षण गरिएकोमा चार करोड ३२ लाख ४१ हजार अर्थात ४.७५ प्रतिशत बेरुजु रकम देखिएको छ । यो जिल्लाको डिलासैनी गाउँपालिकापछि बढी बेरुजु हो । त्यस्तै, डिलासैनी गाउँपालिकामा सबैभन्दा बढी बेरुजु रहेको छ । डिलासैनीमा कुल एक अर्ब १० करोड ८१ लाख पाँच हजारको लेखापरीक्षण गरिएकोमा पाँच करोड ६८ लाख १५ हजार अर्थात ५.१३ प्रतिशत बेरुजु रहेको छ ।

दोगडाकेदार गाउँपालिकामा जिल्लाका स्थानीय तहहरुमध्ये सबैभन्दा कम बेरुजु देखिएको छ । दोगडाकेदारमा एक अर्ब ३० करोड ९३ लाख ७५ हजारको लेखापरीक्षण गरिएकोमा एक करोड १२ लाख ५७ हजार अर्थात ०.८६ प्रतिशत मात्रै बेरुजु रहेको छ । त्यस्तै पञ्चेश्वर गाउँपालिकामा ७२ करोड १२ लाख ४७ हजारको लेखापरीक्षण गरिएकोमा १ करोड १८ लाख ४८ हजार अर्थात १.६४ प्रतिशत बेरुजु रहेको छ । शिवनाथ गाउँपालिकामा ६९ करोड ७७ लाख ७२ हजारको लेखापरीक्षण गरिएकोमा एक करोड ६९ लाख ३ हजार अर्थात १.५३ प्रतिशत बेरुजु रहेको छ ।

सिगास गाउँपालिकामा एक अर्ब ४४ करोड ३३ लाख सात हजारको लेखापरीक्षण गरिएकोमा एक करोड ४३ लाख ६ हजार अर्थात १.३७ प्रतिशत बेरुजु रहेको छ । सुर्नया गाउँपालिकामा एक अर्ब ८८ लाख ७१ हजारको लेखापरीक्षण गरिएकोमा एक करोड ५७ लाख ४४ हजार अर्थात् १.५६ प्रतिशत बेरुजु रहेको महालेखाको प्रतिवेदनमा उल्लेख छ । महालेखा परीक्षक कार्यालयले बुधबार ६२ औं वार्षिक प्रतिवेदन २०८२ सार्वजनिक गरेको थियो ।