पाकिस्तानको वायु रक्षा प्रणाली ध्वस्त पारेको भारतको दाबी

काठमाडौँ : भारतले बिहीबार बिहान पाकिस्तानको वायु रक्षा प्रणाली ध्वस्त पारेको छ । बुधबार राति अबेर पाकिस्तानी सेनाले १५ वटा भारतीय सैन्य अड्डाहरूमा आक्रमण गरेको थियो । यसपछि भारतीय सेनाले यो ठूलो कारबाही गर्दै उचित जवाफ दिएको भारतीय मिडियाहरुले उल्लेख गरेका छन् ।
भारतीय रक्षा मन्त्रालयले यस बारेमा जानकारी दिदै भनेको छ- ‘मे ७ को राति पाकिस्तानले उत्तरी र पश्चिमी भारतका शहरहरूलाई निशाना बनायो । यसमा अवंतीपोरा, श्रीनगर, जम्मू, पठानकोट, अमृतसर, कपुरथला, जालंधर, लुधियाना, आदमपुर, भटिंडा, चंडीगढ़, नल, फलोदी, उत्तरलाई र भुजमा ड्रोन र मिसाइलहरू प्रहार गरिएको थियो ।’

रक्षा मन्त्रालयले आज बिहान पाकिस्तानले गरेको आक्रमणपछि, भारतीय सशस्त्र बलले पाकिस्तानका धेरै स्थानहरूमा रहेको वायु रक्षा रडार र प्रणालीहरूलाई लक्षित गर्न हार्पी ड्रोनहरू प्रयोग गरेको बताएको छ । भारतको कारबाही पाकिस्तानको जस्तै क्षेत्रमा र उही गतिमा गरिएको छ । मिडिया रिपोर्टमा लाहोर, सियालकोट, कराँचीमा रहेका वायु रक्षा प्रणालीहरू ध्वस्त पारिएको बताइएको छ ।

भारतले एस-४०० प्रणालीबाट पाकिस्तानको वायू रक्षा प्रणाली ध्वस्त गरेको बताएको छ । यसले ६०० किलोमिटर टाढाको लक्ष्य ट्र्याक गर्न सक्छ ।

एस-४०० एक वायु रक्षा प्रणाली हो । यसले हावा मार्फत हुने आक्रमणलाई रोक्छ । यो शत्रु देशका क्षेप्यास्त्र, ड्रोन, रकेट लन्चर र लडाकु विमानहरूबाट हुने आक्रमण रोक्न प्रभावकारी छ । यसले ६०० किलोमिटर टाढाको लक्ष्यलाई ट्र्याक गर्न सक्छ र यसको लक्ष्य प्रहार दायरा ४०० किलोमिटर छ । यो रूसको अल्माज सेन्ट्रल डिजाइन ब्यूरो द्वारा निर्माण गरिएको हो र यसलाई विश्वको सबैभन्दा आधुनिक वायु रक्षा प्रणाली मध्ये एक मानिन्छ ।