बैतडी : बैतडीका दुई पालिकामा थप १२ जना क्षयरोगका बिरामी फेला परेका छन् । जिल्लाको पुर्चाैडी नगरपालिका र सुर्नया गाउँपालिकामा थप १२ जना क्षयरोगीका बिरामी फेला परेका हुन् ।
क्षयरोगमुक्त अभियान अन्तर्गत पुर्चाैडी नगरपालिकाका विभिन्न वडाहरुमा सञ्चालन भएको खोजपड्ताल शिविरबाट थप ६ बिरामी फेला परेका नगरपालिकाका जनस्वास्थ्य निरीक्षक सुरेन्द्रप्रसाद अवस्थीले बताए । शिविरमा एआइ जडित डिजिटल एक्सरेमार्फत छातीको एक्सरे गरिएको र शंकास्पद बिरामीहरुको खकार परीक्षण गरेर क्षयरोग भए/नभएको पत्ता लगाईएको उनले बताए ।
शंकास्पद बिरामीहरुको खकार परीक्षण गर्दा थप ६ जनामा क्षयरोग पुष्टि भएको र उनीहरुलाई उपचारको दायरामा ल्याइएको उनले बताए । यसअघि पुर्चौंडीमा २१ जना क्षयरोगका बिरामी उपचारमा रहेका छन् । यस्तै सुर्नया गाउँपालिकाका विभिन्न वडामा सञ्चालन भएको खोजपड्ताल शिविरबाट थप ६ जना क्षयरोगका बिरामी फेला परेका क्षयरोगमुक्त अभियानका संयोजक धुव्रचन्द्र जोशीले बताए । नयाँ बिरामीहरुलाई उपचारको दायरमा ल्याइसकेको उनले बताए ।
समुदायमा रहेका क्षयरोगका बिरामीहरुलाई उपचारको दायरमा ल्याउन खोजपड्ताल शिविरको आयोजना गरिएको सुर्नया गाउँपालिकाका स्वास्थ्य शाखा प्रमुख रामसिंह महराले बताए । बैतडीमा १ सय २ जना क्षयरोगका बिरामीहरु उपचारमा रहेका छन् । पुर्चौंडी र सुर्नयामा १२ जना नयाँ बिरामी फेला परेपछि क्षयरोगीको संख्या १ सय १४ जना पुगेको छ ।
प्रतिक्रिया दनुहोस्