काठमाडौं : कैलालीको अत्तरियामा स्थित दुर्गालक्ष्मी बहुमुखी क्याम्पसमा सम्पन्न स्वतन्त्र विद्यार्थी युनियन (स्ववियु) निर्वाचनमा नेपाली विद्यार्थी संघ (नेविसंघ) प्यानलले विजय हासिल गरेको छ ।
सभापतिका लागि नेविसंघका उम्मेदवार भुवन महरा ४४१ मत प्राप्त गर्दै आफ्नो प्रतिद्वन्द्वी बम बहादुर विश्वकर्मालाई पछि पार्दै विजयी भए । विश्वकर्माले ३७८ मत प्राप्त गरेका थिए ।
यसअघि पनि सभापति पदमा रहेका महरा यसपटक दोस्रो कार्यकालको लागि निर्वाचित भएका छन् । सचिव पदमा नेविसंघकी उम्मेदवार ज्योति साहुले ४७४ मत प्राप्त गर्दै विजयी भइन् । उनका प्रतिस्पर्धी गणेशनाथ योगीले ३२६ मत ल्याए ।
कोषाध्यक्ष पदमा पनि नेविसंघकी उम्मेदवार सोनिया शाहले ४४५ मत ल्याएर आफ्नो प्रतिस्पर्धी दीपिका जोशीलाई ३५१ मतसहित हराए ।
यस निर्वाचनमा सदस्य पदमा पनि नेविसंघका उम्मेदवारहरू विजयी भएका छन् । बुधबार सम्पन्न भएको निर्वाचनमा कुल ८३१ मत खसेका थिए, जसमा नेविसंघको प्यानलले बहुमत प्राप्त गरेको छ ।
प्रतिक्रिया दनुहोस्