धनगढी उपमहानगरपालिकाको सिप मेलाः १०४ युवाले पाए रोजगारी, ४० स्वरोजगारमा

अत्तरिया : कैलालीको धनगढी उपमहानगरपालिकाले सञ्चालन गरेको सीप तथा रोजगार मेलाबाट १०४ जनाले रोजगारी पाएका छन्। फागुन ८ देखि चैत १५ गतेसम्म सञ्चालन भएको मेलामा सहभागी युवामध्ये केहीलाई रोजगारदाता कम्पनीहरूले मेला स्थलमै छनोट गरेका थिए।

धनगढीको खुलामञ्चमा आयोजित मेलामा एक हजार ४० जना सहभागी थिए, जसमा ५७० पुरुष र ४७० महिला थिए। उनीहरूलाई एक महिना सीप तालिम, पाँच दिन उद्यमशीलता तथा करिअर परामर्श, र अन्तिम दुई दिन रोजगार मेला सञ्चालन गरिएको थियो।

मेलामा सहभागीमध्ये केहीले प्रयोगात्मक अभ्यास (OJT) गरिरहेका छन्, जसको अवस्थाबारे वैशाख दोस्रो सातासम्म पूर्ण विवरण आउने संयोजक चन्द्र महराले बताए। उनका अनुसार १०४ जनाले पूर्णरूपमा रोजगारी पाएका छन् भने अन्य केहीको रोजगारी प्रक्रिया अझै चलिरहेको छ।

सीप मेलापछि हालसम्म ४० युवाले स्वरोजगार सुरु गरेका छन्। उनीहरूले खाजा–नास्ता पसल, बेतबाँस क्राफ्ट जस्ता व्यवसाय थालेका छन्। प्लम्बिङ, ग्राफिक्स डिजाइन, डिजिटल मार्केटिङ, वेटर, कफी बारिस्टा, मोटरसाइकल मर्मत, इलेक्ट्रिक भेहिकल मर्मत लगायतका २९ प्रकारका तालिम प्रदान गरिएको थियो।

धनगढी उपमहानगरपालिकाले श्रम बजारको मागअनुसार तालिम सञ्चालन गरेको बताएको छ। मेलाबाट दक्ष जनशक्ति उत्पादन भई स्वरोजगार र रोजगारमा जोडिन थालेकाले कार्यक्रम सफल भएको उपमहानगरले जनाएको छ।