नेपाल यू–१९ माथि अफगानिस्तानको ठूलो जित

काठमाडौँ :  नेपाल यू–१९ पहिलो युथ एकदिवसीय क्रिकेटमा बिहीबार अफगानिस्तान यू–१९ सँग १ सय ३० रनले पराजित भएको छ।

३ सय १ रनको विशाल लक्ष्य लिएर आएको नेपाल ४६.२ ओभरमा १ सय ७० रनले अलआउट भयो। नेपाल र अफगानिस्तानको यू–१९ टोली अर्को साता मूलपानीमै सुरु हुने आईसीसी यू–१९ विश्वकप एसिया छनोट प्रतियोगिताको तयारीको क्रममा तीन खेलको यो शृंखला खेलिरहेका छन्। अफगानिस्तान यू–१९ ले पहिलो पटक नेपालमा आएर शृंखला खेलिरहेको हो।

नेपालसँगको यो विजयले अफगानिस्तान यू–१९ विश्वकपमा पुग्न प्रमुख दावेदार रहेको पनि देखाएको छ। ओपनर निरजकुमार यादवले नेपालबाट सर्वाधिक ५३ रन बनाए। उनले ६१ बल खेलि ४ चौका र २ छक्का प्रहार गरे। अर्का ओपनर साहिल पटेल २ रनमै आउट भएका थिए । कप्तान नरेन भट्ट १३, सिब्रिन श्रेष्ठ ११, अमर मिश्र १, रोशन विश्वकर्मा ४, अभिषेक तिवारी १७ रनमा आउट भए।

तल्लोक्रममा सन्तोष यादव र अशोक धामीले समान २४ रन बनाए। सन्तोषले ३९ बल खेलि १ चौका र अशोकले २६ बल खेलि ३ चौका प्रहार गरे । विपिन शर्मा ४ रनमा बोल्ड भए। दयानन्द मण्डल ४ रनमा अविजित रहे। अफगानिस्तानबाट वाहिदुल्लाह जद्रान, जतिउल्लाह साहिन र महबुब खानले २–२ तथा अब्दुल अजिज, नुरिस्तानी ओमारजाई र नाफिफुल्लाह अमिरीले १–१ विकेट लिए।

यसअघि टस जितेर ब्याटिङ रोजेको अफगानिस्तान यू–१९ ले मूलपानी क्रिकेट मैदान निर्धारित ५० ओभरमा ९ विकेट गुमाई ३ सय रन बनाएको थियो। फैजल शिनोजादाले अफगानिस्तानबाट सर्वाधिक ९७ रन बनाए। शतकको नजिक पुगेर सन्तोष यादवको बलमा आउट भएका उनले ८८ बल खेलि ९ चौका र ४ छक्का प्रहार गरे  उजेरउल्लाह निजाई २२ बलमा २ चौका र १ छक्का प्रहार गर्दै २४ रन बनाई आउट भएको अवस्थामा शिनोजादाले ओपनर खालिद अहमदजाईसँग दोस्रो विकेटमा १ सय ५४ रनको साझेदारी गरेका थिए।

अहमदजाई १ सय ७ बल खेलि ६ चौकाका साथ ७६ रन बनाए। कप्तान महबुब खानलाई सन्तोषले ९ रनमा कट एन्ड बोल्ड गरे। बक्रत इब्राहिमजाईले २६ बल खेलि समान २ चौका र छक्कासाथ ३५, अजिजुल्लह मिया खिलले २० बलमा २ चौकासहित २१ र नाजिफुल्लाह अमिरीले ७ बलमा १ छक्कासहित १० रन बनाए।

अब्दुल अजिज १० बल खेलि १ छक्कासहित १५ रन बनाए। उनले नै इनिङ्सको अन्तिम बलमा दयानन्द मण्डललाई छक्का प्रहार गरि अफगानिस्तानको स्कोरलाई ३ सय रनमा पुर्याएका थिए। नेपालबाट देव्रेहाते स्पिनर सन्तोषले १० ओभरमा ६४ रन खर्चेर ३ विकेट लिए अभिषेक तिवारीले ८ ओभरमा ६१ रन खर्चेर २ तथा दयानन्द र विपिन शर्माले १–१ विकेट लिए।