ताला फुटाएर कार्यकक्षमा हाजिर भए काठमाडौंका प्रमुख प्रशासकीय अधिृकत गुरागाईं

काठमाडौँ : काठमाडौं महानगरपालिकाका प्रमुख प्रशासकीय अधिृकत सरोज गुरागाईं महानगरपालिका कार्यालयमा हाजिर भएका छन् । उनलाई कर्मचारीहरूले नै सुरक्षा दिएर कार्यकक्षसम्म पु-याएका छन् । कर्मचारीहरूले उनको कार्यकक्षमा लगाइएको ताला फुटाएरै प्रमुख प्रशासकीय अधिकृत गुरागाईंलाई कार्यकक्षमा पु¥याएका हुन् । गुरागाईंलाई महानगरपालिकामा रोक्न मेयर बालेन्द्र शाहले महानगर प्रहरी परिचालन गरी अवरोध गरेका थिए ।

उनले गुरागाईंको कार्यकक्षसमेत बन्द राख्न लगाएका थिए । हाजिर हुन महानगरपालिका पुगेका गुरागाईंलाई नगर प्रहरीले गेटमै अवरोध गर्न खोजेका थिए । तर, कर्मचारीहरूले रोक्न नदिइ उनलाई कार्यालय प्रवेश गराएर हाजिर गराएका हुन् ।

गुरागाईं २०८१ पुस १४ गतेदेखि निलम्बनमा छन् । महानगरका मेयर बालेन शाहले उनलाई निलम्बन गरेका हुन् । काठमाडौं टावर १२ तलाको बनाउने भनिएको थियो । तर, त्यसलाई १९ तलाको बनाउन स्वीकृति दिएको आरोपमा गुरागाईंलाई कार्यालयमा उपस्थित हुन रोक लगाइएको छ ।

महानगरले गुरागाईंमाथि छानबिन गर्न तीन समिति बनाएको थियो । तर, संघीय मामिला तथा सामान्य प्रशासन मन्त्रालयले गुरागाईंलाई नै काम गर्ने वातावरण मिलाउन निर्देशन दिँदै आएको थियो ।