काठमाडौंको वायु प्रदूषणमा सुधारको संकेत, बेलुकासम्म आकाश खुल्ने सम्भावना

काठमाडौं : केही दिनदेखि संसारकै प्रदूषित सहरको सूचीमा रहेको काठमाडौंको हावाको गुणस्तरमा आजदेखि सुधार आउने अनुमान गरिएको छ।

आईक्यूएयरको तथ्यांकअनुसार, आज बिहान काठमाडौंको एयर क्वालिटी इन्डेक्स (AQI) खतरनाक स्तरमै रहेको छ। AQI ३७० माइक्रोग्राम प्रतिघनमिटर मापन गरिएको छ । जुन मानवीय स्वास्थ्यका लागि जोखिमपूर्ण मानिन्छ । AQI स्केलअनुसार, १५१–२०० स्तर अस्वस्थ, २०१–३०० निकै अस्वस्थ, र ३०१ भन्दा माथि खतरनाक मानिन्छ।

तर, वातावरणविद्हरूका अनुसार प्रदूषणको स्तर आजदेखि विस्तारै घट्दै जानेछ। भारतका अत्यधिक प्रदूषित सहरहरू नयाँ दिल्ली र मुम्बईमा वायु प्रदूषण कम भएसँगै काठमाडौंको प्रदूषण पनि घट्ने अनुमान गरिएको हो।

आईक्यूएयरले आज बेलुकासम्म काठमाडौंको आकाश खुल्ने र दिउँसो २ बजेदेखि वायु गुणस्तरमा सुधार आउने सम्भावना रहेको जनाएको छ।

यसैबीच, वातावरण विभागले नागरिकहरूलाई सकेसम्म घरभित्रै बस्न, बाहिर निस्कनै परे मास्कको प्रयोग गर्न, र प्रदूषण बढाउने गतिविधि नगर्न आग्रह गरेको छ।

काठमाडौंका बासिन्दाले शुद्ध हावाका लागि अझै केही दिन कुर्नुपर्ने भए पनि आजदेखि सुधारको संकेत देखिन थालेको छ।