जिर्ण बन्दै कवर्ड हल, अस्तित्व नै मेटिने खतरा बढ्यो !

धनगढी । सुदूरपश्चिम प्रदेशको अस्थाई राजधानी धनगढीस्थित कवर्ड हल पछिल्ला दिन जिर्ण बन्दै गएको छ । जिल्ला, क्षेत्रीय तथा राष्ट्रिय खेल संचालन हुने कवर्ड हल जिर्ण बन्दा कवर्ड हलको अस्तित्व नै मिटिने खतरा बढेको छ ।    

अहिले कवर्ड हलमा निर्माण गरिएका संरचनामध्ये अधिकांश संरचना भत्किएका छन् । थुप्रै संरचना पुरानो भएर खुइलिएका छन् भने ठिकठाक अवस्थामा रहेका संरचना पनि संरक्षण नपाउँदा थोत्रिदै गएका छन् । अर्कोतर्फ बर्खायाममा खेल मैदान हिलाम्य हुँदा अभ्यास खेल खेल्न पनि जटिल हुनेगरेको खेलाडिहरुले गुनासो गरेका छन् । 

समग्रमा कुनैबेला देशकै दोस्रो रंगशालाका रुपमा स्थापित धनगढीको कवर्ड हल अहिले विलय हुने लाइनमा छ ।

यता कैलाली जिल्ला खेलकुद समितिका कार्यालय प्रमुख आश्रम केसीले पनि कवर्ड हलको अवस्था दिनप्रतिदिन नाजुक बन्दै गएको स्वीकारेका छन् । ‘कवर्ड हलको अवस्था दयनीय नै छ । 

‘बर्खामा पानी जमेर खेल मैदान समुन्द्र बन्छ’, उनले भने, ‘संघ सरकार, प्रदेश सरकार जताजतै धाइसक्यौँ । विभिन्न मन्त्रिलाइ ल्याएर देखाईसक्यौँ तर कसैले सुनेन । माटो भरान गरेर मात्र भए पनि बर्खामा खेल्ने वातावरण बनाउन आग्रह गर्दा पनि सुनुवाई भएन ।’

त्यति मात्र होइन, पटकपटक गुहार गर्दा बल्लतल्ल बजेट आए पनि फ्याट्टफुट्ट आउने बजेटले प्रयाप्त र आवश्यक काम गर्न पनि नपुग्ने केसीले बताएका छन् ।  

यति बिघ्न समस्या र चुनौती हुँदा पनि कवर्ड हलको विकास गर्ने विषयमा न स्थानीय सरकार अग्रसर छ, न प्रदेश सरकार चासो देखाउँछ, न त केन्द्र सरकार अनुरोध सुन्छ । त्यही कारण आज व्यापक खेल हुनुपर्ने कवर्ड हल राजनीतिक कार्यक्रम गर्ने थलो र प्रधानमन्त्रिको हेलिकप्टर ल्याण्ड गर्ने ठाउँमा मात्र सिमित होला कि भन्ने पीर बढेको छ । यसतर्फ सम्बन्धित सबैले बेलैमा ध्यान दिन आवश्यक छ ।