प्रधानमन्त्री र गृहमन्त्रीले राजीनामा दिनुपर्छ : ज्ञानेन्द्र शाही

काठमाडौं : राष्ट्रिय प्रजातन्त्र पार्टी (राप्रपा) प्रवक्ता ज्ञानेन्द्र शाहीले प्रधानमन्त्री केपी शर्मा ओली र गृहमन्त्री रमेश लेखकको राजीनामा माग गरेका छन्।

उनले तीनकुने क्षेत्र घटनालाई लिएर प्रधानमन्त्री ओली र गृहमन्त्री लेखकको राजीनामा माग गरेका हुन्।

‘आन्दोलनमा सहभागी नभएका मान्छेलाई गोली हान्ने र हत्या गर्ने प्रधानमन्त्री र गृहमन्त्रीले तत्काल राजीनामा दिनुपर्छ। र निर्दोष मान्छेलाई हत्या गरेको अभियोगमा प्रधानमन्त्री, गृहमन्त्री र गोली हान्ने प्रहरीलाई पक्राउ गर्नुपर्छ,’ उनले फेसबुकमा लेखेका छन्।

उनले सत्ता र शक्तिको आडमा सर्वसाधारणमाथि गोली चलाउन नपाइने टिप्पणी गरेका छन्। ‘बाटोमा हिँडेका मान्छेलाई, घरबाट निस्केका मान्छेलाई गोली हान्दै हिँड्न पाइँदैन। तिमीहरूसँग जनता डराउनुपर्ने हो र ? तिमीहरूले झुटा मुद्दा लगाउँदै मान्छे थुन्नुपर्ने हो र ? तिमीहरूले भ्रष्टाचार गर्ने, देश लुट्ने हो र ? युवाहरूलाई बेरोजगार बनाउने र? अनि आवाज उठायो भने गोली हान्दै हिँड्ने, झुटो मुद्दा लगाएर थुन्ने ? होसियार, एक दिन अवस्था यस्तो हुनेछ कि तिमीहरूलाई लुक्नका लागि पनि ठाउँ भेटिने छैन ?,’ उनले लेखेका छन्।