कञ्चनपुरको बेलौरीबाट  नियन्त्रणमा लिइएको बाघलाइ राष्ट्रिय निकुञ्जमा छोडियो

धनगढी : कञ्चनपुरको बेलौरी नगरपालिका–२, टेँढुवागाउँबाट नियन्त्रणमा लिइएको वयस्क भाले पाटेबाघलाई सोमवार राति राष्ट्रिय निकुञ्जमा छाडिएको छ।

सबै प्रक्रिया पूरा गरेर बाघलाई शुक्लाफाँटा राष्ट्रिय निकुञ्जको कोर एरियामा छाडिएको डिभिजन वन कार्यालय कञ्चनपुरका प्रमुख रामविचारी ठाकुरले बताए। गत शुक्रवार राति टेँढुवागाउँ पसेको बाघलाई आइतबार दिउँसोतिर मात्रै नियन्त्रणमा लिइएको थियो।  बाघले गाउँमा एक बाच्छालाई मारेको थियो। बेलैमा सतर्कता अपनाइएका कारण मान्छेलाई भने कुनै नोक्सानी भएन।

चारैतिर बस्ती भएको ठाउँमा पुगेको बाघ एक दिनभरि गहुँबारीमा बसेको थियो। सन् २०२२ को तथ्याङ्क अनुसार शुक्लाफाँटामा ३६ वटा पाटेबाघ छन्। डिभिजन वन क्षेत्र अन्तर्गतका स्थानबाट उद्धार गरिएका बाघलाई डिभिजन वन कार्यालय र निकुञ्ज तथा मध्यवर्ती क्षेत्रबाट उद्धार गरिएका बाघलाई निकुञ्जले व्यवस्थापन गर्ने गर्छन्।

सुदूरपश्चिम प्रदेशमा उद्धार केन्द्र नहुँदा बाघ व्यवस्थापन गर्न समस्या छ। प्रदेश सरकारले वन्यजन्तु उद्धार केन्द्र बनाउन आवश्यक रहेको प्रमुख ठाकुरको भनाइ छ। “सुदूरपश्चिम प्रदेशमै उद्धार केन्द्र नहुँदा समस्या छ,” उनले भने, “प्रदेश सरकारले उद्धार केन्द्र बनाउनु पर्छ।” दुई वर्षअगाडि बेलौरीकै खप्टीखोलामा बाघले एक महिलालाई मारेको थियो। नियन्त्रणमा लिइएको त्यो नरभक्षी बाघलाई सदर चिडियाखानामा राखिएको छ।