काठमाडौं : बिम्स्टेक सम्मेलनलाई छेको पारेर थाइल्यान्डको औपचारिक भ्रमणमा रहेका प्रधानमन्त्री केपी शर्मा ओलीलाई त्यहाँको सरकारले ‘गार्ड अफ अनर’ दिएको छ।
समारोहमा थाइल्याण्डका प्रधानमन्त्री पे थोङ् थान् शिनावात र मन्त्रीहरूसहित उच्च अधिकारीले स्वागत गर्नुका साथै गार्ड अफ अनर निरीक्षण गरेका थिए।
नेपाल–थाइल्याण्ड कूटनीतिक सम्बन्धको ६५ वर्षको इतिहासमा पहिलोपटक नेपाली प्रधानमन्त्रीले थाइल्याण्डको औपचारिक भ्रमण गरेका छन्।
प्रधानमन्त्री ओली र थाइ समकक्षी शिनावातबीच भेटवार्ता जारी छ। यो भ्रमणबाट दुई देशबीचको आपसी सम्बन्ध विस्तार र सहकार्यमा योगदान पुग्ने अपेक्षा गरिएको छ।
परराष्ट्र मन्त्रालयका अनुसार भेटवार्तापछि संस्कृति र पर्यटनका क्षेत्रमा सहकार्यसम्बन्धी सम्झौतापत्रमा हस्ताक्षर हुने छ। यसैगरी दुई देशबीचका गैरसरकारी र व्यावसायिक संस्थाबीच विभिन्न छ सहमतिपत्र आदाप्रदान हुनेछ।
सम्झौतापछि दुवै प्रधानमन्त्रीले संयुक्त पत्रकार सम्मेलन गर्ने कार्यक्रम छ।
त्यसपछि प्रधानमन्त्री ओली आफ्नो सम्मानमा समकक्षी सिनावातले आयोजना गरेको दिवभोजमा सहभागी हुनेछन् । प्रधानन्त्री ओलीले आजै थाइल्याण्डका राजा महा बजिरालोङकर्नसँग शिष्टाचार भेट गर्ने कार्यक्रम छ।
औपचारिक भ्रमण सकिएपछि बिम्स्टेक सदस्य मुलुकको सम्मेलनमा प्रधानमन्त्री सहभागी हुनेछन्।
प्रतिक्रिया दनुहोस्