दुर्गालक्ष्मी नमुना माविको १२ कोठे भवनको उद्घाटन

अत्तरिया : कैलालीको अत्तरियामा रहेको दुर्गालक्ष्मी नमुना माविको १२ कोठे विद्यालय भवनको उद्घाटन गरिएको छ । सोमबार गोदावरी नगरपालिकाका नगरप्रमुख वीरेन्द्र भट्टले विद्यालय भवनको उद्घाटन गरेका हुन ।

भवनको उद्घाटन गर्दै मेयर भट्टले गोदावरीमा शिक्षाको क्षेत्रमा राम्रो विकास भएको बताए । उनले देशभरमा उत्कृष्ट १० मा पर्ने विद्यालयमा थप भवन निर्माण हुनु खुसीको कुरा भएको बताए । उनले विद्यालयलाई यहाँ सम्म पु-याउन शिक्षकहरूको अथक मिहेनत, विद्यार्थीको लगनशीलता र अभिभावकको विश्वास रहेको बताए । विद्यालयलाई हालको अवस्थासम्म पु-याउन यस क्षेत्रका थुप्रै सामाजिक व्यक्तित्वहरूको ठुलो योगदान रहेको उनले बताए ।

विद्यालय व्यवस्थापन समितिका अध्यक्ष गणेश शाहले विद्यालयको १२ कोठे भवन द्रुत गतिमा निर्माण भएको बताए । उनले नेपाल सरकारको ‘नमुना विद्यालय गुरुयोजना २०७५’ अन्तरगत विद्यालय भवन निर्माण गरिएको बताए ।

विद्यालयका प्रधानाध्यापक शिवराज जोशीले देशभरका १२२ नमुना विद्यालयमा आफूहरूको विद्यालय पर्ने बताउँदै सोही कार्यक्रम अन्तरगत नयाँ भवन निर्माण गरिएको बताए । उनले नमुना विद्यालय बनेपछि भौतिक पूर्वाधारमा ठुलो सफलता प्राप्त भएको बताए ।

उनले भवन निर्माणका लागि १ करोड ८४ लाख ७४ हजार २६६ रुपैयाँ खर्च भएको बताए । उनले भवनका अरू कोठामा फर्निचर व्यवस्थापन भएको बताउँदै २ कोठामा विज्ञान प्रयोगशालाको काम केही बाँकी रहेको बताए । उनले भवनमा प्रदेशकै नमुना विज्ञान प्रयोगशाला बनाउने तयारी रहेको बताए । भवनको २०८० असार ४ गते नगरप्रमुख भट्टले नै शिलान्यास गरेका थिए । भवन करिब १९ महिनामा तयार भएको हो । भवन निर्माणका लागि जयबहादुर धामीको संयोजकत्वमा ५ सदस्यीय निर्माण समिति गठन गरिएको थियो ।