प्रधानमन्त्री कप क्रिकेट : कोशीको पहिलो जित

काठमाडौं : प्रधानमन्त्री कप एकदिवसीय पुरुष क्रिकेटमा कोशी प्रदेशले पहिलो जित निकालेको छ । भैरहवाको एक्स्ट्राटेक ओभल क्रिकेट स्टेडियममा भएको खेलमा कोशीले गण्डकी प्रदेशलाई ९ विकेटले पराजित गरेको हो ।

गण्डकीले दिएको ३२ रनको लक्ष्य कोशी प्रदेशले ८ ओभर २ बलमा १ विकेट गुमाएर पूरा गर्‍याे । यसअघि टस जितेर पहिले ब्याटिङ गरेको गण्डकी प्रदेशले २० ओभर ४ बलमा अलआउट हुँदै ३१ रन बनाएको थियो ।

कोशीका विपिन महतोले ६ तथा फिर्दोस अन्सारीले ३ विकेट लिए । यो जितपछि कोशीले ५ खेलबाट एकमा जित र ४ मा हारसहित २ अंक जोडेको छ । चार खेल खेलेको गण्डकीको तीनमा हार र एकमा जितसहित २ अंक नै छ ।