धनगढी र नेपालगन्ज ‘सबैभन्दा’ गर्मी,

काठमाडौं : देशभर तापक्रम बढ्दो क्रममा छ । गएको फागुन १७ गते ९मार्च १०देखि प्रिमनसुन अवधि सुरु भएयता न्यूनतम र अधिकतम तापक्रम दिनहुँजसो बढिरहेको छ ।

शनिबार (चैत २)  काठमाडौंको अधिकतम तापक्रम २८.१ डिग्री सेल्सियस मापन गरिएको जल तथा मौसम विज्ञान विभागअन्तर्गतको मौसम पूर्वानुमान महाशाखाले जनाएको छ । शुक्रबार (चैत १) काठमाडौंको अधिकतम तापक्रम २६.७ डिग्री थियो ।

काठमाडौंको हालसम्मकै उच्च तापक्रम ३६.६ डिग्री सेल्सियस हो । सन् १९८९ मे ७ मा काठमाडौंको अधिकतम तापक्रम ३६.६ डिग्री सेल्सियस पुगेको थियो । त्यसयता उक्त ‘रेकर्ड ब्रेक’ नभएको महाशाखाले जनाएको छ ।

गत वर्ष काठमाडौंमा २५ वर्षयताकै गर्मी भएको थियो ।

यी आठ स्थानमा तापक्रमले तोड्यो सबै रेकर्ड 
महाशाखाले शनिबार सार्वजनिक गरेको देशका २१ स्थानको विवरणमध्ये धनगढी र नेपालगन्जमा सबैभन्दा बढी गर्मी छ । शनिबार धनगढी र नेपालगन्जको अधिकतम तापक्रम समान ३५.५ डिग्री सेल्सियस मापन गरिएको छ । शुक्रबार धनगढी र नेपालगन्जको अधिकतम तापक्रम समान ३४.८ डिग्री सेल्सियस थियो ।

शनिबार जनकपुरको अधिकतम तापक्रम ३५.२, भैरहवाको ३४.५, सिमराको ३३.४, घोराहीको ३३.३, विराटनगरको ३१.८ डिग्री सेल्सियस मापन गरिएको महाशाखाले जनाएको छ ।

महाशाखाका अनुसार, नेपालमा हालसम्मकै उच्च तापक्रम सन् १९९५ मा मापन गरिएको थियो । १९९५ जुन ५ मा धनगढीको अधिकतम तापक्रम ४६.४ डिग्री सेल्सियस मापन गरिएको थियो । सन् १९९५ मा नेपालगन्ज र भैरहवामा ४५ डिग्री सेल्सियस तापक्रम पुगेको थियो ।