अछाम र बझाङमा भूकम्पीय पुनर्निर्माण तथा पुन : स्थापना आयोजना इकाई स्थापना

कैलाली : सुदूरपश्चिमका अछाम र बझाङमा भूकम्पीय पुनर्निर्माण तथा पुनः स्थापना आयोजना इकाई स्थापना गरिएको छ । शनिवार राष्ट्रिय विपद् जोखिम न्यूनीकरण तथा व्यवस्थापन प्राधिकरणले  दुवै जिल्लामा स्थापना गरेका एकाइको गृहमन्त्री रमेश लेखकले उद्घाटन गरेका छन् ।

उनले भूकम्पबाट प्रभावित भएकालाई सहज ढङ्गले सेवा प्रवाह गर्ने उद्देश्यले एकाइ स्थापना भएको बताए ।  नव स्थापित एकाइमार्फत पीडितलाई आवास निर्माण तथा मर्मत सम्भारका काम गरिने जनाइएको छ ।

भूकम्पीय पुनर्निर्माण आयोजना कार्यान्वयन एकाइ अछामको जिल्ला समन्वय समितिको कार्यालय र बझाङको जयपृथ्वी नगरपालिका–९ देवलमा स्थापना गरिएको छ ।

इकाई कार्यालयमा प्रमुख र प्राविधिकसहित चार जना कर्मचारी रहने जनाइएको छ । पुनः स्थापना आयोजना इकाई कार्यालय आइतबार जाजरकोटमा स्थापना गर्ने कार्यतालिमा रहेको छ ।