थामिएन नेप्सेको गिरावट, २५ अंकले घट्यो !

काठमाडौँ : सेयर कारोबार मापक नेप्से परिसूचक २५.१६ अंकले घटेर २ हजार ८ सय २१.२३ विन्दुमा ओर्लेको छ । अघिल्लो दिनको तुलनामा यो ०.८८ प्रतिशतले घटेको हो । सोमबार र मंगलबार उच्च अंकले घटेको नेप्सेले बुधबार पनि सोही प्रवृत्ति पछ्याएको हो ।

उक्त दिन कारोबारमा आएकामध्ये ६२ वटा कम्पनीको सेयरमूल्य बढ्यो, १७४ वटाको घट्यो भने बाँकी ८ वटा कम्पनीको स्थिर रह्यो । १ लाख १ हजार ६ सय ३ पटकको कारोबारमा २ करोड ३३ लाख ४३ हजार २ सय १ कित्ता सेयर किनबेच भए । ती किनबेचमा करिब १० अर्ब ९७ करोड २६ लाख रुपैयाँ बराबरको सेयर कारोबार भएको छ ।

मंगलबारको तुलनामा बुधबार कारोबार रकम घटेको हो । बुधबार कारोबारमा आएकामध्ये १३ उपसमूहमध्ये व्यापारबाहेक सबैको परिसूचक घटेपछि समग्र नेप्सेमा उच्च अंकको गिरावट आएको हो ।