भूकम्प अपडेट : सात जिल्ला प्रभावित एउटा घरमा पूर्ण रुपमा भत्किदा तीन घरमा आंशिक क्षति

काठमाडौँ : सिन्धुपाल्चोक केन्द्रबिन्दु भएर शुक्रबार बिहान गएको भूकम्पबाट ७ जिल्ला प्रभावित भएको छ। भूकम्पका कारण सिन्धुपलाञ्चोक, भोजपुर, दोलखा र काठमाडौँ, संखुवासभा, म्याग्दी र धादिङ प्रभावित भएको प्रहरीले जनाएको छ ।

भूकम्पका कारण हालसम्म एउटा घर पूर्णरुपमा क्षति भएको र तीन घरमा आंशिक रुपमा क्षति पुगेको प्रहरी प्रधान कार्यालयले जनाएको छ ।

प्रहरी प्रधान कार्यालयका अनुसार एउटा कोट र प्रहरी कार्यालयमा पनि आंशिक क्षति भएको छ। भूकम्पकै कारण तीन परिवार विस्थापित भएको छ। भूकम्पमा परेर हालसम्म ६ जना सामान्य घाइते भएको प्रहरीले जनाएको छ ।

शुक्रबार बिहान २ बजेर५१ मा सिन्धुपलाञ्चोक भोटेकोसी गाउँपालिका-२ भैरवकुण्ड केन्द्रबिन्दु भएर ६. १ म्याग्निच्युडको भूकम्प गएको थियो। सिन्धुपलाञ्चोकको इलाका प्रहरी कार्यालय कोदारीको भवनमा सामान्य क्षति भएको छ। भोटेकुसी गाउँपालिकाको विभिन्न ठाउँमा सुक्खा पहिरो गएको प्रहरीले जनाएको छ।