धनगढी : जिल्ला समन्वय समिति, कैलालीका प्रमुख टीकाकुमारी चौधरी (भुल)सहितको अनुगमन टोलीले माघ १७ गते २९ वटा सवारी नियन्त्रणमा लियो।
कैलालीको खुटिया र गोदावरी नदीमा अवैध दोहन गर्दै आएका सवारीहरू नियन्त्रणमा लिइएको हो। तर, प्रमुख जिल्ला अधिकारी गोगन हमालसहितको टोलीको अगाडीबाट सवारी साधनहरू फरार भए। २९ सवारीमा हालसम्म १३ सवारी सम्पर्कमा आएका छैनन। गोदावरी नगरपालिकाले ११ सवारी कारबाहीको दायरमा नआएको भन्दै जिल्ला समन्वय समितिमा पत्र पठाएको सूचना अधिकारी विमल जोशीले बताए।
समन्वय समितिले जिल्ला प्रहरी कार्यालय, कैलालीलाई पत्राचार गरेको छ। २०८१ फागुन ८ गते पत्राचार गरिएको हो। हालसम्म प्रहरीले नदीको अवैध दोहन गर्ने सवारी नियन्त्रणमा बेवास्ता गरेको हो। जोशीले भने, ‘सेहरी र गोदावरीबाट २९ वटा सवारी साधन नियन्त्रणमा लिएका हौ। हालसम्म सात ट्याक्टर, सात टिप्पर र २ वटा स्काभेटरले मात्र जरिबाना तिरेका छन्। ११ ट्याक्टर र २ स्काभेटर सम्पर्कमा आएका छैनन्।’
कैलालीका गोदावरी र खुटिया खोलाबाट नियन्त्रणमा लिएका २९ सवारीलाई ६ लाख ९५ हजार जरिबाना थियो। तर, हालसम्म सबै सवारीहरूलाई कारबाही गरिएको छैन। नदीजन्य तथा खानीजन्य पदार्थ जिल्ला अनुगमन समिति, कैलालीको बैठकले नियन्त्रणमा लिएका २९ सवारीलाई जरिबाना गर्ने निर्णय गरेको हो।
तर, प्रहरीले सवारी साधनहरू नियन्त्रणमा नलिएकाले कारबाहीसमेत नगरिएको हो। जोशीले भने, ‘हामीले प्रहरीमा पत्राचार गरेका छौ। जिल्ला प्रशासन र गोदावरी नगरपालिकालाई बोधार्थ पठाएका छौ। तर, हालसम्म ११ ट्याक्टर सम्पर्कमा आएका छैनन्।’
सुदूरपश्चिम प्रदेशको आर्थिक वर्ष २०८१/०८२ को आर्थिक ऐनको अनुसूची ६ बमोजिम कारबाही गर्न भनिएको थियो। गोदावरी नगरपालिकाले नदीजन्य पदार्थको ठेक्का सम्झौता गरेको निर्माण कम्पनीलाई समेत कारबाही गरेको छ। गोदावरी नगरपालिका क्षेत्रबाट नियन्त्रणमा लिएका स्काभेटहरूलाई ५०÷५० हजारका दरले जरिबाना गर्न भनिएको हो। टिप्परहरूलाई ३०/३० हजार र ट्याक्टरहरूलाई १५/१५ हजारका दरले कारबाही गर्न भनेको हो।
तर, सबै सवारी साधनहरूबाट जरिबाना गरिएको छैन। एक हजार चार सय ७६ घनमिटर नदीको दोहन गरेका पाइएको छ। नकार्यपालिकाले २४० घनमिटरका दरले तीन लाख ५४ हजार जरिबाना र पाँच प्रतिशत जरिबाना थप गरिएको छ। हालसम्म चार लाख १५ हजार जरिबाना सवारी साधनहरूबाट असुल भएको छ।
गिट्टी, ढुङ्गा, बालुवा उत्खनन बिक्री तथा व्यवस्थापन मापदण्ड, २०७७ को दफा ९ अनुसारको गठन गरिएको जिल्ला अनुगमन समितिले सवारीहरू नियन्त्रणमा लिएको थियो। समितले गोदावरी नगरपालिका–९ सेहरीस्थित खुटिया खोलाबाट २ स्काभेटर, सात टिप्पर र १७ ट्याक्टरलाई नियन्त्रणमा लिएको थियो। समितिले गोदावरी नगरबाट २ स्काभेटर र एक टिप्परलाई अनुगमन टोलीले नियन्त्रणमा लिएको थियो।
प्रतिक्रिया दनुहोस्