सिन्धुपाल्चोक केन्द्रविन्दु भएर ६.१ रिक्टर स्केलको भूकम्प

काठमाडौं : सिन्धुपाल्चोक जिल्लाको भैरवकुण्ड आसपास केन्द्रविन्दु भएर ६.१ रिक्टर स्केलको भूकम्प गएको छ । नेपाल भूकम्प मापन तथा अनुसन्धान केन्द्रका अनुसार शुक्रबार बिहान २:५१ बजे भूकम्प गएको हो ।

भूकम्पको धक्का काठमाडौं उपत्यकासहित देशका विभिन्न भाग तथा दार्जिलिङलगायत भारतमा समेत महसुस गरिएको थियो । अहिलेसम्म क्षतिसम्बन्धी विस्तृत विवरण केही आएको छैन । मध्यरातमा भूकम्प गएपछि सर्वसाधारण होहल्ला गर्दै घरबाहिर निस्केका थिए ।

भुकम्पको केन्द्रविन्दु भएको भोटेकोशी गाउँपालिका ३ का दुगुनागढीका वडाध्यक्ष निमासोना शेर्पाले भुकम्पको धक्कपछि स्थानियहरु घरबाहिर निस्केको बताए । उनले भने, ‘मानविय क्षतिको कुनै सुचना भने आईसकेको छैन ।’

ठूलो भूकम्प गएपनि अहिलेसम्म क्षतिको कुनै विवरण नआएको सिन्धुपाल्चोकका प्रमुख जिल्ला अधिकारी किरण थापाले बताए । उनले भूकम्पको ठूलो धक्का महसुस गरिएपनि अहिलेसम्म क्षतिको कुनै विवरण प्राप्त भइनसकेको बताए । सुरक्षाकर्मीको टोली तयारी अवस्थामा रहेको र आवश्यकता अनुसार फिल्डमा खटिने उनका भनाई छ ।

यसअघि गत पुष ५ मा बाजुरा केन्द्रबिन्दु भएर ५.२ म्याग्निच्युडको भूकम्प गएको थियो। त्यसपछि पनि चार म्याग्निच्युडभन्दा माथिका एक दर्जन हाराहारीमा भूकम्प गइसकेका छन् ।