प्रकृति लम्सालको सम्झनामा नेपाली विद्यार्थीका लागि छात्रवृत्ति कोष स्थापना गरिनेछ : केआईआईटी

काठमाडौं : भारतको ओडिशास्थित कालिंगा इन्स्टिच्युट अफ इन्डस्ट्रियल टेक्नोलोजी (केआईआईटी)ले प्रकृति लम्सालको नाममा छात्रवृत्ति कोष स्थापना गर्ने घोषणा गरेको छ । बिहीबार एक विज्ञप्ति जारी गर्दै विश्वविद्यालयले नेपाली विद्यार्थीका लागि यो छात्रवृत्ति कोष बनाउने जानकारी दिएको हो ।

केआईआईटीका संस्थापक प्राध्यापक अच्युत सामन्तले प्रकृतिको परिवारसँग भेट गरी समवेदना प्रकट गर्दै उनको सपना जीवित राख्ने प्रतिबद्धता जनाएका छन् । प्रकृतिका बुबाको इच्छाअनुसार नेपाली विद्यार्थीहरूलाई लक्षित गरी विशेष छात्रवृत्ति प्रदान गर्न लागिएको उनले जनाए ।

सामन्तले नेपाल राजदूतावासका प्रतिनिधिहरूसँग भेट गर्दै नेपालका परराष्ट्र मन्त्री आरजू राणा देउवा र गृहमन्त्री रमेश लेखकलाई फोनमार्फत विश्वविद्यालयले चालेका कदमबारे जानकारी गराएको बताएका छन् ।

यस्तै, विश्वविद्यालयका रजिस्टार ज्यन राजन मोहन्थीले एक भिडिओ सन्देश जारी गर्दै नेपाली विद्यार्थीहरूलाई सम्पर्क गरिएको र उनीहरूलाई फर्काउन लागिएको बताएका छन् । विश्वविद्यालयले विद्यार्थीहरूलाई नेपाल फर्कन आवश्यक पर्ने यातायात खर्च समेत व्यहोर्ने जानकारी दिएको छ ।

आइतबार साँझ केआईआईटीमा बी-टेक तेस्रो वर्षमा अध्ययनरत बुटवलकी प्रकृति लम्साल आफ्नो होस्टेलमा मृत भेटिएकी थिइन् । घटनापछि विद्यार्थीहरू र विभिन्न संस्थाहरूले विश्वविद्यालय प्रशासनको लापरबाहीको विरोध गर्दै दोषीलाई कारबाहीको माग गरेका थिए ।

सोमबार बिहान विश्वविद्यालयले नेपाली विद्यार्थीहरूलाई होस्टेल खाली गर्न निर्देशन दिएपछि विवाद चर्किएको थियो । विरोध बढेपछि सोमबार साँझ नै विश्वविद्यालयले नेपाली विद्यार्थीहरूलाई फर्कन अनुरोध गरेको थियो । हालसम्म सयौं नेपाली विद्यार्थी विभिन्न नाका हुँदै आफ्नो घर आएका छन् ।