शहीदका बिरामी पिता भेट्न प्रचण्ड पुगे गोरखा

काठमाडौं : नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ शहीदका बिरामी पिता भेट्न गोरखा पुगेका छन्‌ । माओवादी नेतृत्वमा चलेको १० वर्षे सशस्त्र सङ्घर्ष (जनयुद्ध)का शहीद वीरेन ओलियाका बिरामी पिता देवराज ओलियालाई भेट्न दाहाल गोरखाको पालुङटार-८ स्थित घरमै पुगेका हुन्‌ । दाहालले आलियाको स्वास्थ्यलाभ कामना गरे ।

धुवाँकोट गोरखाका पदम ओलिया (वीरेन) माओवादी नेतृत्वको तत्कालीन जनमुक्ति सेना नेपालका प्लाटुन सहकमाण्डर थिए । ०६१ जेठ ४ गते स्याङजा जिल्ला श्रीकृष्णगण्डकी गाविस-४, छापरमा तत्कालीन शाही नेपाली सेनासँग भएको दोहोरो भीडन्तमा पर्दा उनले ज्यान गुमाएका थिए ।

जनयुद्धका शहीद ओलियाका बिरामी पिता भेट्न दाहालसँगै पुत्री गङ्गा दाहाल लगायत सहभागी थिए । दाहालले क्रममा शहीद परिवार र स्थानीयसँग साक्षात्कार गरेका उनको सचिवालयले जानकारी दिएको छ ।