राससले अब थारु र डोटेली भाषामा समाचार दिने तयारी

धनगढी : राष्ट्रिय समाचार समिति (रासस)ले अब थारु र डोटेली भाषामा पनि समाचार दिने तयारी भैइरहेको जनाएकाे छ । राससकाे ६४ औं वार्षिकोत्सवको अवसरमा बुधबार धनगढीमा आयोजित ‘सुशासन र समृद्धिका लागि रासस’ विषयक अन्तरक्रिया कार्यक्रम सुदूरपश्चिम प्रमुख सिद्धराज भट्टले यस्ताे जानकारी दिएका हुन् ।

राससकाे विगत र भावी याेजनाबारे जानकारी दिदैं उनले आगामी दिनमा राससले थारु र डोटेली भाषामा समाचार दिने जमर्को भइरहेको बताए ।

कार्यक्रममा सुदूरपश्चिम प्रदेशका आन्तरिक मामिला तथा कानुनमन्त्री हीरासिं सार्कीले राज्यको चौथो अंगको रुपमा लिइएको पत्रकारितामा ठूलो शक्ति रहेको बताए । उनले सही ढंगले कलम चलाइदिएमा देशको समृद्धिमा ठूलो सहयोग पुग्ने बताए ।

यसैगरी, मुख्यमन्त्री तथा मन्त्रीपरिषद् कार्यालयका सचिव वसन्तप्रसाद कोइरालाले सूचनाको हकलाई ओझेलमा राखेर प्रजातन्त्र र जनताको समृद्धि नहुने बताए । पत्रकारिता र पत्रकारको सम्मान भएमात्रै लोकतन्त्र र प्रजातन्त्र फस्टाउने उनको भनाइ थियो ।

जिल्ला प्रशासन कार्यालय कैलालीका सूचना अधिकारी शिवराज जोशीले राससले नकारात्मकभन्दा सकारात्मक समाचार दिनु प्रशंसनीय कार्य रहेको बताए । नेपाल पत्रकार महासंघका प्रदेश अध्यक्ष भरतबहादुर शाहले रासस समाचारको बैंक भएकोले राससका समाचार सत्य तथ्य र विश्सनीय हुने गरेको बताए । कार्यक्रममा राससका उत्कृष्ट समाचारदाता तिलक ओझालाई सम्मान गरिएको थियो ।