सुदूरपश्चिम सरकारले धनगढीमा राससको कार्यालय भवन निर्माण गर्ने

धनगढी : सुदूरपश्चिम प्रदेश सरकारले राष्ट्रिय समाचार समिति (रासस)को धनगढीमा कार्यालय भवन निर्माण गर्ने भएको छ। प्रदेश सरकारले चालु आर्थिक वर्षमा राससको प्रादेशिक कार्यालय निर्माणका लागि ७० लाख बजेट विनियोजन गरेको हो।

प्रदेशको आन्तरिक मामिला तथा कानुन मन्त्रालय मार्फत भवन निर्माणका लागि बजेट विनियोजन भएको छ। राष्ट्रिय समाचार समितिले भवन निर्माणका लागि प्रक्रिया थाल्नु पर्ने मन्त्रालयले बताएको छ। आन्तरिक मामिला तथा कानुनमन्त्री हीरा सार्कीले राससले भवन निर्माणको प्रक्रियागत कामहरू गर्नुपर्ने बताए। सरकारी समाचार संस्था राससको प्रादेशिक कार्यालय सानो भएकाले स्तरीय कार्यालय निर्माणका लागि बजेट विनियोजन गरिएको हो।

राष्ट्रिय समाचार समिति (रासस)को ६४ औँ वार्षिकोत्सवको अवसरमा धनगढीमा औपचारिक कार्यक्रमको आयोजना गरिएको थियो। राससले विश्वस्नीयता कायम राखेको मन्त्री सार्कीले बताएका छन। उनले पत्रकारितामा ठुलो शक्ति रहेको बताए। उनले भने, ‘पत्रकारले सही ढङ्गले कलम चलाइ दिए प्रदेश र जिल्लाको समृद्धिमा ठुलो सहयोग पुग्छ। राससप्रतिको विश्वास उहिलेदेखि अहिलेसम्म यथावत् रहेको छ।’

यसैगरी, मुख्यमन्त्री तथा मन्त्रीपरिषद् कार्यालयका सचिव वसन्तप्रसाद कोइरालाले सूचनाको हकलाई ओझेलमा राखेर प्रजातन्त्र र जनताको समृद्धि नहुने बताएका छन्। पत्रकारिता र पत्रकारको सम्मान भएमा प्रजातन्त्र सबल हुने उनको दाबी छ। जिल्ला प्रशासन कार्यालय कैलालीका सूचना अधिकारी शिवराज जोशीले राससले नकारात्मकभन्दा सकारात्मक समाचार दिनु प्रशंसनीय कार्य रहेको उल्लेख गरेका छन्।

रासस सुदूरपश्चिम प्रमुख सिद्धराज भट्टको अध्यक्षताका कार्यक्रम भएको थियो। प्रमुख भट्टले आगामी दिनमा राससले थारू र डोटेली भाषामा समाचार दिने जमर्को गरिरहेको बताए। कार्यक्रममा राससका उत्कृष्ट समाचारदाता तिलक ओझालाई सम्मान गरिएको छ।