धनगढीमा फागुन ८ देखि १२ गते सम्म प्रादेशिक ललितकला प्रदर्शनी हुँदै !

धनगढी : नेपाल ललितकला प्रज्ञा–प्रतिष्ठान र सुदूरपश्चिम प्रज्ञा–प्रतिष्ठानको संयुक्त आयोजनामा भोलि (फागुन ८) देखि धनगढीमा प्रादेशिक ललितकला प्रदर्शनी हुने भएको छ।

प्रादेशिक प्रदर्शनीका लागि प्रदेशका डेढ सय भन्दा बढी कलाकारका कला कृति दर्ता भैसकेको सुदूरपश्चिम प्रज्ञा–प्रतिष्ठानका उपकुलपति डा.टीएन जोशीले बताए।सुदूरपश्चिम प्रज्ञा–प्रतिष्ठानको कार्यालय हसनपुरमा हुने ललितकला प्रदर्शनीको भोलि (८ गते) दिउसो १ बजे उदघाटन हुने उपकुलपति जोशीले बताए।

पाँच दिनसम्म हुने प्रदर्शनी फागुन ८ देखि १२ गतेसम्म बिहान १० बजेदेखि पाँच बजेसम्म अवलोकन गर्न सकिने आयोजकले जनाएको छ। प्रदर्शनीमा सुदूरपश्चिमका चित्रकला, मूर्तीकला, लोककला र हस्तकलाको प्रदर्शनी हुने जनाइएको छ।

सुदूरपश्चिम प्रज्ञा–प्रतिष्ठानका उपकुलपति तथा संस्कृतिविद डा. टीएन जोशीले सुदूरपश्चिम प्रदेशमा ललितकलाको विकास पछाडि परेकोले गतवर्षबाट नेपाल ललितकला प्रज्ञा–प्रतिष्ठानसंगको सहकार्यमा प्रादेशिक प्रदर्शनी शुरू गरिएको बताए।उपकुलपति जोशीले प्रदर्शनी अवलोकनका लागि सबै सरोकारवाला,शिक्षक, विद्यार्थी, अभिभावक, सञ्चारकर्मी, कलाकार, स्रष्टा, राजनीतिकर्मी, समाजसेवी सबैलाई आमन्त्रण गरेका छन्।