अमेरिकाले तत्कालका लागि रोक्यो एमसीसी अन्तर्गतको सहयोग भुक्तानी

काठमाडौँ : अमेरिकाले विवादित मिलेनियम च्यालेञ्ज कर्पोरेशन (एमसीसी) अन्तर्गतको सहयोग भुक्तानी तत्कालका लागि रोकेको छ। नेपालमा नुवाकोटदेखि बुटवल हुँदै गोरखपुरसम्मको ४०० केभीए प्रसारण लाइन र पाँचवटा सडक स्तरोन्नतिको काम प्रभावित हुने निश्चित भएको छ।

नेपाल सरकारले चालु आर्थिक वर्षमा एमसीसी कार्यक्रमको जम्मा ८ प्रतिशत बजेट खर्च गरेको विवरण सार्वजनिक गरेको छ। अमेरिकी सरकारले ५५ करोड अमेरिकी डलर अनुदान र नेपाल सरकारले १९.७ करोड डलर लगानी गर्ने सम्झौता थियो।

विद्युत् प्रसारण लाइनको डिजाइन र निर्माणसँगै ४०० केभी सब-स्टेशनहरू पनि निर्माण हुँदै थियो। यस्तै, महेन्द्र राजमार्गको ४० किमी सडक खण्ड मर्मतको काम सुरु भएको थियो। एमसीसीले पारदर्शिता र सुशासनको मापदण्ड पूरा गर्ने देशलाई मात्र अनुदान उपलब्ध गराउँदै आएको छ।