पूजाको दियोबाट सल्किएर आगलागी, ७० लाख बराबरको क्षति

झापा : झापाको कचनकवल–६ कमल बस्तीमा भएको आगलागीमा करिब ७० लाख रुपैयाँ बराबरको धनमाल क्षति भएको छ। बनियानी बजारबाट करिब ७ सय मिटर पश्चिम कमल बस्तीका कमलप्रसाद खतिवडाको दुईतले १० कोठे घरमा आगलागी भएको हो।

आगलागीबाट घरसहित भित्र रहेको नगद १ लाख २५ तोला सुन, चाँदी ७५ तोला, २ थान एसी, २ थान स्मार्ट टेलिभिजन, अन्य सामग्री जलेर करिब ७० लाख रुपैयाँ बराबरको क्षति भएको प्रहरीले जनाएको छ।

हिजो शनिबार राति पुजा कोठामा बालेको दियोबाट आगो सल्किन गई आगलागी भएको जनाइएको छ। इलाका प्रहरी कार्यालय बनियानीबाट खटिएको प्रहरी, सशस्त्र प्रहरी, स्थानीय, भद्रपुर, मेचीनगर र बिर्तााोड नगरपालिकाको दमकलको सहयोगमा तीन घण्टापछि आगो नियन्त्रणमा लिइएको थियो।