कार्यसम्पादन मूल्यांकनमा पहिलो स्थानमा धनगढी हुदाँ चुरे गाउँपालिका अन्तिम स्थानमा

धनगढी : राष्ट्रिय प्राकृतिक स्रोत तथा वित्त आयोगले सार्वजनिक गरेको कार्यसम्पादन मूल्यांकनमा कैलालीमा ६३/३ अंक सहित धनगढी उपमहानरपालिका पहिलो स्थानमा हुँदा ३९/२ अंक सहित चुरे गाउँपालिका जिल्लामा अन्तिम स्थानमा रहेको छ । चुरे सुदूरपश्चिममै सबैभन्दा कम अंक सहित पुछारमा रहेको छ । कैलालीको गोदावरी नगरपालिका जिल्लामा पाँचौ स्थानमा रहेको छ । गोदावरी ५८/७ अंक सहित पाँचौँ स्थानमा रहेको हो ।

यस्तै जानकी गाउँपालिका दोस्रो स्थानमा रहेको छ, जसको अंक ६३/१ रहेको छ । बर्दगोरिया गाउँपालिका ६२/७ अंकसहित तेस्रो स्थानमा रहेको छ भने घोडाघोडी नगरपालिका ६१/७ अंकसहित चौथो स्थानमा रहेको छ । पाँचौँ स्थानमा गोदावरी हुँदा छैटौँ स्थानमा ५४/६ अंकसहित कैलारी गाउँपालिका रहेको छ ।

टीकापुर नगरपालिका ५२/७ अंकसहित सातौँ, जोशीपुर गाउँपालिका ५०/४ अंकसहित आठौँ, गौरीगगा नगरपालिका ४७/१ अंकसहित नवौँ र भजनी नगरपालिका ४७/१ अंकसहित दशौँ स्थानमा रहेका छन् । लम्की चुहा नगरपालिका, मोहन्याल गाउँपालिका, चुरे गाउँपालिका क्रमशः ४४/४, ४०/५, र ३९/२ अंक प्राप्त गर्दै सूचीको अन्तिम तीन स्थानमा रहेका छन् ।

डडेल्धुराको अमरगढी नगरपालिका देश भरी नै पहिलो स्थानमा पर्न सफल भएको छ । अमगरगढी ८१/७ अंक सहित देशभरमै पहिलो स्थानमा पर्न सफल भएको हो । आयोगले सार्वजनिक गरेको कार्यसम्पादन मूल्यांकनमा देशभरमा ८०/२ अंक सहित इलामको सुर्योदय नगरपालिका दोस्रो स्थानमा रहेको छ भने ८०/१ अंक सहित अर्घाखाँचीको सन्धीखर्क नगरपालिका तेस्रो स्थानमा रहेका छन ।

बजेट विनियोजनदेखि कार्यक्रम कार्यान्वयनसम्मको प्रदर्शनका आधारमा मापन हुने कार्यसम्पादन मूल्यांकनमा सुदूरपश्चिमबाट अमरगढी पछि ७४/२ अंक सहित दार्चुलाको नौगाड गाउँपालिका दोस्रो स्थानमा रहेको छ भने डोटीको दिपायल सिलगढी नगरपालिका ६८/९ अंक सहित तेस्रो स्थानमा रहेको छ ।

यस्तै जिल्लागत रुपमा डडेल्धुरामा ८१/७ अंक सहित अमरगढी नगरपालिका पहिलो हुँदा ५४/२ अंक सहित भागेश्वर गाउँपालिका अन्तिम स्थानमा रहेको छ । दार्चुलामा ७४/२ अंक सहित नौगाड गाउँपालिका पहिलो स्थानमा हुँदा ५१/३ अंक सहति लेकम गाउँपालिका अन्तिम स्थानमा रहेको छ ।

डोटीमा ६८/९ अंक सहित दिपायल सिलगढी नगरपालिका पहिलो स्थानमा हुँदा ५०/६ अंक सहित सायल गाउँपालिका जिल्लामा अन्तिम स्थानमा रहेको छ । यस्तै बझाङमा ६७/९ अंक सहित मष्टा गाउँपालिका पहिलो स्थानमा छ भने ४४/५ अंक सहित दुर्गाथली गाउँपालिका पुछारमा रहेको छ ।

अछाममा ६६/१ अंक सहित मंगलसेन नगरपालिका पहिलो स्थानमा रहेको छ भने ४९/९ अंक सहित रामारोशन गाउँपालिका जिल्लामा अन्तिम स्थानमा रहेको छ । कञ्चनपुरमा ६४/७ अंक सहित भीमदत्त नगरपालिका पहिलो स्थानमा रहदा ४२/१ अंक सहित बेलडाँडी गाउँपालिका जिल्लामा पुछारमा रहेको छ ।

बाजुरामा सबैभन्दा धेरै ६४/५ अंक सहित त्रिवेणी नगरपालिका पहिलो स्थानमा छ भने सबैभन्दा कम अंक सहित ४५/४ अंक सहित खप्तड छेडेदह गाउँपालिका अन्तिम स्थानमा छ । बैतडीमा ६२/५ अंक सहित पुर्चौडी नगरपालिका पहिलो स्थानमा रहदा ४६/२ अंकसहित पञ्चेश्वर गाउँपालिका पुछारमा रहेको छ ।

राष्ट्रिय प्राकृतिक स्रोत तथा वित्त आयोगले माघ ३० गते कार्यसम्पादन मुल्याङ्कनको आधारमा प्रदेश सरकार र स्थानीय तहले प्राप्त गरेको अंक सम्बन्धी विवरण प्रकाशित गरेको थियो । आयोगले प्राप्त अंकमा चित्त नबुझे ७ दिन भित्र आवश्यक आधार र प्रमाण सहित पुनरावलोकनका लागि उजुरी दिन भनेको छ । आयोगका अनुसार स्थानीय सरकारले ऐन अनुसार १० असारभित्र सम्बन्धित गाँउ–नगरसभामा बजेट पेश गर्नुपर्छ । त्यसो भए–नभएकोलाई एक सूचक मानिएको छ । बजेट असार मसान्त भित्र पास गर्नुपर्छ । गरे–नगरेको विषय अर्को सूचक हो ।

स्थानीय तहले घरजग्गा रजिष्ट्रेसन शुल्क, मनोरञ्जन कर, विज्ञापन करबाट उठेको रकम प्रदेश सरकारलाई हस्तान्तरण गरे–नगरेकोलाई समेत सूचक मानिएको छ । विनियोजित बजेट, त्यसको कार्यान्वयन, राजस्व संकलनको लक्ष्य र प्रगतिलाई समेत आयोगले मूल्यांकनको आधार बनाएको छ ।

लेखा परीक्षण, आवधिक योजना, सामुदायिक विद्यालयमा रहेका विद्यार्थीको संख्या, गर्भ जाँच गर्ने महिलाको संख्या, स्वास्थ्य संस्थामा सुत्केरी हुने महिलाको संख्या, बालबालिकाको संख्या, पूर्ण खोप लगाएका बालबालिकाको संख्या समेतलाई मूल्यांकनको आधार बनाइएको छ । राष्ट्रिय प्राकृतिक स्रोत तथा वित्त आयोगले वित्तीय समानीकरण अनुदान सिफारिस गर्दा अघिल्लो वर्षको कार्य सम्पादनलाई हेर्ने गर्छ ।