काठमाडौँ : प्रहरीको हिरासतमा रहेका एक व्यक्तिलाई छुटाइदिने बहानामा रकम असुली गर्ने आरोपीलाई प्रहरीले पक्राउ गरेको छ । पक्राउ पर्नेमा इनरुवा नगरपालिका वडा नं. ६ का २२ वर्षीय आकाश भनिने विनोद दाहाल रहेका छन् ।
लागूऔषध मुद्दाको अनुसन्धानको क्रममा म्याद थप गरेर इलाका प्रहरी कार्यालय पकलीको हिरासतमा रहेका हेमन विश्वकर्मालाई छुटाइदिने र आफूलाई प्रहरी निरीक्षक भनेर रकम असुली गरेको आरोपमा उनलाई पक्राउ गरिएको सुनसरी प्रहरीले जानकारी दिएको छ ।
हेमन विश्वकर्माका आमा लीला विश्वकर्माबाट पटकपटक गरी २५ हजार रुपैयाँ असुली गरेको र थप १५ हजार भएमा छोरा छुटाइदिने भन्दै ठगी गरेको कुरा प्रहरी अनुसन्धानबाट बाहिर आएको छ ।
पीडितको उजुरीपछि दाहाललाई रामधुनी नगरपालिका वडा नं. ५ स्थित लगौना मोडबाट रकम लिँदै गरेको अवस्थामा पक्राउ गरिएको एसपी सुमन तिम्सिनाले बताए ।
पक्राउ गरिएको समयमा दाहालसँग १५ हजार रुपैयाँ र मोबाइल बरामद गरिएको छ । उनलाई सुनसरी जिल्ला अदालतबाट सात दिनको म्याद थप गरेर ठगी मुद्दामा अनुसन्धान भइरहेको प्रहरीले जानकारी दिएको छ ।
प्रतिक्रिया दनुहोस्