टीकापुरदेखि बझाङको सेती लोकमार्गको लम्बाइ तीन सय ५९ किलोमिटर, १५ वर्षसम्म अधुरै

धनगढी : कैलालीको टीकापुरदेखि बझाङको उरै भञ्जयाङसम्म सेती लोकमार्गको लम्बाइ तीन सय ५९ किलोमिटर छ। सेती लोकमार्गको हालसम्म एक सय ८७ किलोमिटर मात्र ट्रयाक निर्माणको काम सकिएको छ। एक सय ७२ किलोमिटर सडकको ट्रयाक निर्माणको काम अधुरो रहेको छ।

आर्थिक वर्ष २०६६/०६७ सालबाट प्रत्येक वर्ष सङ्घीय सरकारले बजेट विनियोजन गर्दै आएको छ। तर, राजमार्गको आधा काम पनि सकिएको छैन। सडक निर्माण थालिएको १५ वर्षसम्म काम अधुरो रहेको हो। दश वर्षमा सडकको ट्रयाक खोल्ने लक्ष्य रहेकोेमा १५ वर्षसम्म पनि आधा काम पनि सकिएको छैन।

कैलाली, डोटी, अछाम, बाजुरा र बझाङका नागरिकलाई सडक सञ्जालसँग जोड्न सडक निर्माण थालिएको हो। सेती लोकमार्ग निर्माणका लागि दक्षिणी खण्डको अछामको साँफेबगर र उत्तरी खण्डको झाङको चैनपुरमा योजना कार्यालयहरू छन्। सेती राजमार्ग योजना कार्यालय, साँफेका प्रमुख वीरेन्द्र चन्दले कैलालीमा तीन किलोमिटर, डोटीमा ४० किलोमिटर र अछाममा सात किलोमिटर ट्रयाक निर्माणको काम बाँकी रहेको बताए। उनले भने, ‘बाजुरामा बाँकी छैन। डोटीमा सबै भन्दा बढी बाँकी हो। कैलालीमा तीन किलोमिटर जति बाँकी छ।’

उत्तरी खण्ड चैनपुरबाट चीनको स्वशासित क्षेत्र तिब्बतसँगको सीमा उरैभञ्ज्याङसम्म एक सय १७ किलोमिटर दूरी पर्छ। ट्रयाक केबल ४० किलोमिटर मात्र खोलिएको छ। सेती राजमार्गको उत्तरी खण्डमा ७७ किलोमिटरको ट्रयाक निर्माणको काम बाँकी रहेको छ। २०७४ सालबाट सुरु भएको उत्तरी खण्डको काम सात वर्षसम्म न्यून गोतीमा रहेको छ।

सेती लोकमार्गको दक्षिणी खण्डमा १० र उत्तरी खण्डमा २ वटा निर्माण कम्पनीले हाल काम गर्दै छन्। तर, बजेट अभाव छ। दक्षिणी क्षेत्रमा ट्रयाक खोल्नकै लागि २ अर्ब, १२ करोड ८८ लाख बजेट आवश्यक देखिन्छ। तर, राज्यले हालसम्म ५५ करोड ३८ लाखमा सीमित बनाएको छ।

दक्षिणी खण्ड निर्माणका लागि ट्रयाक खोल्न अझै एक अब ५० करोड, ग्राभेल गर्न ७ अर्ब र कालोपत्रे गर्न ११ अर्ब बजेट आवश्यक पर्छ। तर, हालको गतिले अझै दशकसम्म सेती लोकमार्ग बन्ने आशा छैन। अर्बौँ बजेट आउनुपर्नेमा हरेक वर्ष सरदर २० देखि ३० करोड छ। बझाङको चैनपुरदेखि ताक्लाकोटसम्म पर्ने उत्तरी खण्डको निर्माण आर्थिक वर्ष २०८४/०८५ मा सम्पन्न गर्ने लक्ष्य राखिएको छ।