दार्चुलाको कार्यालयमा कार्यरत कर्मचारी अवस्थीको मृत्यु, गाउँपालिकाले दियो शोक बिदा

दार्चुला : दार्चुलाको मालिकार्जुन गाउँपालिकाले आज शोक बिदा दिएको छ । गाउँपालिका कार्यालयमा कार्यरत कर्मचारी जगदीश चन्द्र अवस्थीको आईतबार मृत्यु भएपछि गाउँपालिकाले आज (सोमबार) शोक बिदा दिएको हो ।

कार्यालयका कर्मचारीको मृत्यु भएको शोकमा गाउँपालिका भित्र रहेका सबै सरकारी कार्यालयहरुमा शोक बिदा दिईएको गाउँपालिकाका सूचना अधिकारी सुरज प्रसाद जोशीले जानकारी दिए । उनले गाउँपालिकामा रहेका अत्यावश्यक बाहेकका सबै कार्यालयहरुमा बिदा दिईएको बताए ।

गाउँपालिकाकै वडा नं. ५ डाँडाकोट घर भई गाउँपालिका कार्यालयमा उद्यम विकास संयोजकको रुपमा कार्यरत अवस्थीको दुर्घटनामा परी आइतबार मृत्यु भएको थियो ।

भारतको प्रयागराजमा लागेको महाकुम्भ मेलामा सहभागी हुन जाँदै गरेका अवस्थीको लखनउमा गाडीले ठक्कर दिएर मृत्यु भएको हो । आफू सवार गाडीबाट झरेको बेला सडकमा अर्को गाडीले ठक्कर दिएपछि गम्भीर घाइते भएका उनलाई उपचारका लागि अस्पताल लगिएको थियो । तर अस्पतालमा चिकित्सकले उनलाई मृत घोषणा गरेका थिए ।