कञ्चनपुर -१६ को मझगाउँ विमानस्थल कालोपत्र गर्न जग्गा प्राप्तिको लफडा

धनगढी : कञ्चनपुरको भीमदत्त नगरपालिका–१६ को मझगाउँ विमानस्थल निर्माण गर्न २०७८ सालमा सम्झौता भयो। कान्छाराम–केएस–उमा एन्ड कम्पनीसँग ४५ करोड ६६ लाखमा तीन वर्षमा काम पूरा गर्न ठेक्का सम्झौता भएको थियो।

तर, सम्झौता भएको तीन वर्षसम्म ४८ प्रतिशत मात्र काम पूरा भएको छ। शुक्लाफाँटा राष्ट्रिय निकुञ्जको रत्न बाटीका रहेको क्षेत्रको जग्गाको स्वामित्व नागरिक उड्डयन प्राधिकरणले नपाएकाले विमानस्थल कालोपत्रमा समस्या भएको छ। रुख नभएको क्षेत्रमा काम गरेको निर्माण कम्पनी धावनमार्ग कालोपत्रको तयारीमा छ।

तर, जग्गाको भोगाधिकार नआएकाले समस्या भएको हो। मझगाउँ विमानस्थल आयोजनाका इन्जिनियर मीनराज ओझाले जग्गा प्राप्तिका लागि फाइल वन मन्त्रालयमा पुगेको बताए। उनले भने, ‘रत्नबाटीकाको रुख नभएको क्षेत्रमा काम गरेका छौ। तर, धावनमार्गको दायाँ–बायाँ काम गर्न पाएका छैनौ। निकुञ्ज विभागबाट वन मन्त्रालय फाइल पुगेको छ। एक हप्तामा हुन्छ भन्नु भएको थियो। तर, चार हप्ता भयो, अझै स्वीकृति पाएको छैन।’

मझागाउँ विमानस्थलमा एक हजार पाँच सय २५ मिटर लामो धावनमार्ग निर्माण गरिदैछ। निर्माण कम्पनीले एक हजार तीन सय ३० मिटरसम्म धावन मार्ग कालोपत्रकोत यारी गरेको छ। धावनमार्गमा बेसको काम पूरा भएको छ। निर्माण कम्पनीले कालोपत्रका लागि आवश्यक सामाग्री पनि ल्याएको छ। तर, तीन सय ५० मिटर रत्न बाटीकाको जग्गा नागरिक उड्डयन प्राधिकरणको नाउमा नआएकाले काम रोकिने अवस्था आएको छ। नौ सय ८० मिटर क्षेत्रको मात्र नागरिक उड्डयन प्राधिकरणको नामको पुर्जा रहेको छ। ओझाले भने, ‘बेसको काम सकियो। धावनमार्गको दायाँ–बायाँ काम गर्नुछ। जग्गा प्राप्तिको काम भएको छैन। निर्माण कम्पनी तयारीमा छ। कालोपत्रको लागि सामाग्री पनि ल्याउनु भएको छ।’

मझगाउँ विमानस्थल कालोपत्रको चरणमा पुगेको छ। तर, विमानस्थलको धावनमार्गका लागि आवश्यक सेनाको खेलमैदान तथा बाटीकाको जग्गा प्रयोगको अधिकार नागरिक उड्डयन प्राधिकरणसँग छैन। सङ्घीय मन्त्रीपरिषद्ले प्राधिकरणको नाममा जग्गा दिने निर्णय गर्नुपर्ने छ। तर, ठेक्का सम्झौताको तीन वर्ष हुँदा पनि निर्णय भएको छैन। निकुञ्ज विभागबाट जग्गा हस्तान्तरणको फाइल वन मन्त्रालय पुगेको छ। तर, मन्त्रालयले मन्त्रीपरिषद्मा पेस गरेको छैन। कालोपत्रको काम एक महिनामा पूरा हुने भएपनि मन्त्रीपरिषद्ले निर्णय गर्न ढिलो गर्दैछ। नउले भने, ‘नागरिक उड्डयनको नाममा जग्गा नभएकाले काम गर्न समस्या हो। रुख नभएको क्षेत्रमा काम भएको छ। तर, सबै ठाउँमा काम भएको छैन। मन्त्रीपरिषद्को निर्णय चाहिएको छ।’

कालोपत्रको काम पूरा भएपछि ८० प्रतिशत काम पूरा हुने छ। एक महिनामा कालोपत्रको काम सकिन्छ। तर, जग्गा प्राप्तिको लफडा समाधान नभएकाले गृहमन्त्री रमेश लेखककै जिल्लाको विमानस्थल निर्माणको काम रोकिने अवस्था आएको हो। विसं २०३० देखि मझगाउँ विमानस्थलमा हवाई सेवा सुरु भएको थियो। सशस्त्र द्वन्द्वका बेला विसं २०५६ मा सुरक्षाको कारण देखाउँदै विमानस्थल बन्द गरिएको थियो।