हिमपात नहुँदा हिउँदेबाली सुक्न थाले, भोकमरीको त्रास

मुगु : माघ महिनाको तेस्रो साता बितिसक्दा पनि मुगुलगायत जुम्ला, डोल्पा, कालीकोट, हुम्ला जस्ता हिमाली जिल्लामा हिमपात नहुँदा किसानले लगाएको हिउँदे अन्नबाली खेतमै सुक्न थालेको छ । जसका कारण भोकमरीको त्रास थपिएको छ ।

मुगुसहित हिमाली जिल्लाका किसानहरुले लगाएको हिउँदे अन्नबाली जै, गहुँ, उवा, तरकारी स्याउका विरुवा सुक्न थालेका छन् । खडेरीका कारण बाली नउम्रेर जग्गा खाली भएको र उमे्रको अन्नबाली खेतबारीमै सुक्न थालेको किसानहरुले बताएका छन् ।

विगतका वर्षहरुमा पुस(माघ महिनामा धेरै हिउँ पर्ने भएकाले खेतबारी ओसिलो भइरहने र अन्नबाली फस्टाउने गरेको थियो, तर यस वर्ष हिउँ नपर्दा खेतबारीमा लगाएको अन्नबालीसहित वनजङ्खलसमेत सुख्खा भएका छन् ।सिंचाइका लागि कुलो नहर नभएको, खेतीयोग्य जमिन सबै आकाशे पानीको भरमा खेती गर्नुपर्ने अवस्था रहेको छ । हिउँ पानी नपर्दा बाली नफस्टाउने भएकाले भोकमरी हुनसक्ने सम्भावना रहेको छायाँनाथ रारा नगरपालिका- ९ मुर्माका किसान बिर्खबहादुर रोकायाले बताए ।

मुगु जिल्लामा १ हजार ७८५ हेक्टर क्षेत्रफलमा खेतीयोग्य जमिन लगाएको अन्नबालीमध्ये ७० प्रतिशतभन्दा बढी आकाशे हिउँपानीको भरमा खेती गर्नुपर्ने बाध्यता छ ।विगत तीनचार वर्षयता बेलामौका पानी नपरेकाले समस्या भोग्दै आएका किसानहरु यस वर्ष माघ महिनाको तेस्रो साता बितिसक्दा पनि हिउँ र पानी नपर्दा किसान तनावमा छन् ।

सरकारले साना सिंचाइका कार्यक्रम सञ्चालन गरे पनि त्यो अपुग भएको छ । विशेषगरी पछिल्लो समय जलवायु परिवर्तनको प्रत्यक्ष असरका कारण हिउँ-पानी नपरेको, पानीका मुहानहरु सुक्दै गएकाले कृषकलाई समस्या भएको जिल्ला कृषि विकास कार्यालय मुगुका कृषिप्रचार अधिकृत तथा सूचना अधिकारी अनुजकुमार मण्डलले बताए ।