गोदावरीमा रहेको नवकुञ्ज शिव मन्दिरमा महायज्ञ लाग्ने

कैलाली : कैलालीको गोदावरी नगरपालिका– ४ मा रहेको नवकुञ्ज शिव मन्दिरमा महायज्ञ लाग्ने भएको छ । यही माघ २१ गतेदेखी मन्दिरमा एक हप्ताका लागि महायज्ञ लाग्ने भएको हो ।

महायज्ञ मुल आयोजक समितिका संयोजक खगेन्द्र प्रसाद ओझाले २८ गतेसम्म मन्दिरमा सप्ताह महायज्ञ लाग्ने बताए । उनले धार्मिक क्षेत्र भएपनि पिछडीएको रुपमा रहेको शिवकुञ्ज मन्दिरको स्तरोन्नतीका लागि महायज्ञ लगाउन लागिएको बताए । महायज्ञमा महागुरु ऋषिकेश उपाध्यायले प्रबचन गर्ने उनले बताए ।

उनले प्राणप्रतिष्ठा, सप्ताहा, नवाहा लगायतका धार्मिक क्रियाकलापहरु गर्ने हिन्दु धर्मको संस्कार नै भएको बताए । ‘हाम्रा पुर्खाहरु गर्दै आएका कार्यहरु पनि भएकाले हामीले त्यसैलाई आधार बनाएर तल्लीन भएर लागेका छौ’ उनले भने ‘महायज्ञ बाट उठेको रकमले जिर्ण अवस्थामा रहेका मन्दिरका संरचनाहरु निर्माण गर्ने योजना बनाएका छौ ।’ उनले मन्दिरमा विभिन्न क्रियाकलापका लागि संरचनाहरु बनाउने भनेर नै महायज्ञ लगाउन लागिएको बताए ।

महायज्ञ सञ्चालनका लागि समितिले तयारी थालिसकेको छ । संयोजक ओझाका अनुसार महायज्ञ सञ्चालनका लागि मन्दिर वरपर सरसफाई गर्ने, गेट निर्माण गर्ने लगायत कार्यहरु भैरहका छन । यस्तै मन्दिर व्यवस्थापन समितिका अध्यक्ष टिकाराम जोशीले हिन्दु परम्परा अनुसार मन्दिरमा महायज्ञ लगाए भुत, प्रेत, दोष सबै निवारण हुने बताए ।

उनले महायज्ञले मन्दिरको पनि केही आम्दानी हुने बताए । उनका अनुसार हालसम्म मन्दिरमा शिवरात्री मनाउने, भजनकृतन गर्ने, देउडा खेल्ने, जनै पुर्णीमामा जनै फेर्ने तथा विवाह ब्रतबन्ध गर्ने लगायतका धार्मिक कार्यहरु हुने गरेका छन । उनले मन्दिरमा कथा र अखण्ड रामायण पनि लगाईएको बताए । उनले मन्दिर आस्थाका धरोहर पनि भएको बताए ।

यस्तै स्थानिय टेक बहादुर खड्काले मन्दिरमा लाग्ने महायज्ञले मानिसहरुलाई अनुशासनमा जोड्ने काम गर्ने बताए । उनले धार्मिक ज्ञानका लागि महायज्ञहरुमा उपस्थित हुन अनिवार्य रहेको समेत बताए । उनले महायज्ञले मन्दिरको संरचना निर्माण मा पनि सहयोग पु¥याउने विश्वास व्यक्त गरे ।