खो खो विश्वकपको फाइनलमा भारतले जिते दुवै तर्फको उपाधि

काठमाडौं : खो खो विश्वकपको फाइनलमा नेपालको महिला र पुरुष दुवै टोली उपविजेता बनेको छ। दुवै तर्फको उपाधि भारतले जितेको छ।

नयाँ दिल्लीस्थित इन्दिरा गान्धी इन्डोर हलमा आइतबार राती भएको पुरुषतर्फको फाइनलमा नेपाल आयोजक भारतसँग ५४–३६ अन्तरले पराजित भएको हो । महिला तर्फको फाइनलमा पनि भारतसँग ७८– ४० ले पराजित भएको हो ।

पुरुष तर्फ भारतले दुवै इनिङ्समा नेपाललाई दबाबमा राखेको थियो । पहिलो इनिङ्समा भारतले अट्याकिङबाट २६ अंक जोडेको थियो । दोस्रो इनिङ्समा २८ अंक जोड्यो । नेपालले दुवै इनिङ्समा समान १८ अंक जोडेको थियो । पुरुषतर्फको उद्घाटन खेलमा पनि भारतले नेपाललाई पराजित गरेको थियो ।

भारतले महिला र पुरुष दुवै विधामा उपाधि जित्दा नेपाल भने दुवैमा उपविजेता बनेको हो । पहिलो पटक आयोजना भएको खो खो विश्वकपमा दक्षिण एसियाका दुई राष्ट्र भारत र नेपालले अन्य राष्ट्रलाई पछि पार्दै फाइनल यात्रा तय गरेका थिए । विश्वकपको कुनै पनि टिम गेममा नेपाल फाइनल पुगेको खो खो विश्वकप नै पहिलो हो ।