डोटीको पुर्वीचौकी गाउँपालिका–१ जिल्लामै पहिलो बालमैत्री वडा घोषणा

डोटी : डोटीको पुर्विचौकी गाउँपालिका– १ खिरसैनलाई बालमैत्री वडा घोषणा गरिएको छ । सरकारले तयार पारेको बालमैत्री स्थानीय शासन कार्यान्वयन निर्देशिका अनुसारको सूचक पुरा गरेसँगै उक्त वडालाई जिल्लाकै पहिलो बालमैत्री वडा घोषणा गरिएको हो ।

उक्त निर्देशिकाले बालमैत्री वडा घोषणा गर्नुपर्ने ५१ वटा सूचक तयार गरेको थियो । उक्त सूचकहरुमध्ये वडा नं. १ ले ४८ वटा सूचकहरु पुरा गरेकाले बालमैत्री वडा घोषणा गरिएको बताईएको छ ।
५ सय घरधुरी रहेको वडामा २ हजार ८१० जनसंख्या रहेको छ ।

५१ सूचकमा गर्भवती महिला, नवजात शिशुको स्वास्थ्य जाँच, टीटी विरुद्धको खोप, दक्ष स्वास्थ्यकर्मीबाट सुत्केरी गराएको, ६ महिनासम्म अनिवार्य स्तनपान, ५ वर्षसम्मका बालबालिकालाई भिटामिन ए क्याप्सुल खाएको हुनुपर्ने व्यवस्था छ । बाल श्रममुक्त, हिंसारहित, बालविवाह निषेधितको आधार तयार भएपछि एक कार्यक्रमका बिच शनिबार सुदूरपश्चिम प्रदेशका सामाजिक विकास मन्त्री माननीय मेघराज खडकाले बालमैत्री वडा घोषणा गरेका थिए ।

५१ ओटा सूचक अन्तर्गत ८८ प्रतिशत भन्दा बढी सूचक पुरा गरेकाले सो वडा बालमैत्री घोषणा गरेको गाउँपालिका अध्यक्ष राम उपाध्यायले बताए । उनले आगामी दिनमा पालिकाका सबै वडा र पालिकालाई बालमैत्री गर्ने अभियान अगाडी बढाएको बताए । कार्यक्रममा बालमैत्री वडा घोषणा गर्न सूचकअनुसार आर्थिक, भौतिक र सांस्कृतिक रूपमा सहयोग गर्ने विभिन्न संघसंस्थालाई सम्मान गरिएको थियो ।